“N’emën të Shtetit Shqyptar, gjithë auktoritet civile e ushtërore janë të lutun me e lanë të kalojë lirisht z. Bajram Curri”, shkruan në faqen e parë të pasaportës së Bajram Currit. I njëjti shkrim është edhe në gjuhën frënge. Më poshtë shkruan se pasaporta është lëshuar në Tiranë, më 4 nëntor në vitin 1924. Pjesa, ku është grisur faqja e parë e pasaportës, nuk lejon të lexohet çfarë shkruan tek përshkrimi “i vjefshëm”. Po kështu është edhe nënshkrimi i “kryetarit të zyrës”.
Faqet vende-vende të grisura të pasaportës së Bajram Currit janë të lidhura me pe, ndërsa i mungon kopertina.
I riu nga Kosova Veton Mullatahiri, i cili tani jeton në Lyon të Francës, ka disa javë që e mban në duar pasaportën e Bajram Currit. A thotë se e ka dhuratë nga një mik, identitetin e të cilit nuk dëshiron ta zbulojë.
Pasaporta ka disa vula të udhëtimeve të Bajram Currit, ndërsa kjo është e veçanta e kësaj pasaporte thotë Mullatahiri, i cili në Kosovë ka studiuar Biznes Menaxhment.
“I kam thirrur disa muze për ta dorëzuar pasaportën, por pastaj vendosa ta mbaj për vete”, ka treguar ai për “Zërin”. Mullatahiri, i cili thotë se e ka origjinalin e pasaportës së vitit 1924, tregon se e ka pranuar si dhuratë kur ka qenë në Gjenevës.
Në të dhënat personale në pasaportë të Bajram Currit shkruan se është i lindur në vitin 1866, është nga Gjakova, ndërsa jeton në Tiranë, me profesion është pronar, ndërsa udhëton drejt Evropës. Në shënimet për të shkruan: “Shtati: mesatar, mosha: 58 vjeç, balli: natyral, sytë: gështenjë, hunda: rregullt, flokët: të thi, mjekra: rrueme, mustaqet: të thi, ngjyra: granit”.
91 vjet më parë, një vit para se të vritej, kur Bajram Curri ishte pajisur me këtë pasaportë, siç është edhe vula në të, ai kishte shkruar në Gjenevë. Në vulën e vendosur në pasaportë shkruan se viza është valide për në Francë dhe është lëshuar më 7 tetor në vitin 1924. Në biografinë e Bajram Currit shkruan se “në vjeshtë të vitit 1924 shkoi në Gjenevë për të paraqitur para Lidhjes së Kombeve çështjen e të drejtave të popullsisë shqiptare të Kosovës të shtypur egërsisht nga serbomëdhenjtë”.
Mullatahiri thotë se vulat në pasaportë, që tregojnë disa udhëtime të Bajram Currit, i kanë bërë përshtypje. “Vulat, që janë të vërteta, në ‘Wikipedia’ i pashë që ka pasur udhëtime në Gjenevë”, thotë ai, duke treguar se ka hulumtuar për të parë nëse pasaporta është vërtet e Bajram Currit.
“Kam pyetur çka të bëj me të. Nuk dija, ta dërgoj diku apo ta mbaj për vete”, ka treguar Veton Mullatahiri, duke shtuar se pasi është nga Gjakova e Bajram Curri ka qenë i Malësisë së Gjakovës ka vendosur që ta mbajë pasaportën. “Unë jam nip i Rexh Hotit, fisit Hoti. Gjyshi im ka pajtuar gjaqe në atë kohë, ka pajtuar edhe disa familje vonë të Rahovecit. Ai ka qenë figurë historike, kështu që pasaportën e kthej në Kosovë, në Gjakovë tek gjyshi im”, ka thënëMullatahiri.
“E pabesueshme” i duket Vetonit fakti që në duar mban pasaportën e udhëheqësit popullor, ushtarak, senatorit të Senatit të Dhomës së Këshillit Kombëtar të Shqipërisë. “Ajo qe sa vjet nuk është ruajtur në ndonjë qendër kulturore a muze, por është mbajtur nëpër duar të njerëzve deri më tani, tash e mbaj unë”, ka thënë Mullatahiri për gazetën, derisa ka treguar se nuk ka besim te institucionet e Kosovës dhe të Shqipërisë që ta dorëzojë tek ato.
“Nuk e besoj se do ta dorëzoj. Në një anë e konsideroj dhuratë se për këtë qëllim e kam në duart e mia. Sado që ka vlerë nuk e mohoj, është dhuratë për mua, jo për muzeun”, është shprehur VetonMullatahiri për pasaportën që ka 24 faqe dhe është me numër 269.
