Letërnjoftimi digjital, pritet të jetë dokumenti i radhës virtual me të cilin do të pajisen shqiptarët.
Ky propozim i reflektuar nga Ministria e brendshme në ndryshimin që i është bërë ligjit “Për letërnjoftimin elektronik të shtetasve shqiptarë”, është hedhur tashmë për konsultim publik. Por çfarë është letërnjoftimi digjital dhe për çfarë do të shërbej ai.
MINISTRIA E BRENDSHME “Identiteti digjital, si një mjet që mundëson njohjen e një personi në ambientin digjital, përfshin informacione personale, si emrin, datën e lindjes, adresën, dhe të tjera të dhëna të rëndësishme, duke krijuar mundësinë e sigurimit të një përputhje të lartë të standardeve dhe sigurisë në të gjithë vendet anëtare, për të lehtësuar lëvizjen dhe komunikimin nëpërmjet platformave dixhitale brenda BE-së dhe për të forcuar sigurinë dhe mbrojtjen e të dhënave personale.”
Megjithatë, pajisja me këtë dokument të ri nuk e bën të pavlefshëm letër-njoftimin fizik aktual.
“Letërnjoftimi mund të jetë në formë elektronike ose digjitale. Në çdo rast, shtetasit mund të zgjedhin për t’u pajisur me një nga format e letërnjoftimit, ose mund të pajisen njëkohësisht me letërnjoftimin në të dy format, elektronike dhe digjitale.
Ekspertët kanë argumentuar se miratimi i këtij projektligji, do të përmbushë objektivat e qeverisë në drejtim të identitetit digjital, duke standardizuar identifikimin e qytetarëve në nivel evropian dhe implementuar një identitet digjital të përbashkët, i cili mund të lehtësojë komunikimin dhe bashkëpunimin me institucionet dhe bizneset evropiane. Gjithashtu, një identitet digjital i përbashkët mund të ndihmojë në luftën kundër krimit të organizuar dhe mashtrimeve.”
