Një pasagjer i MH17 “parashikoi” fundin tragjik të avionit të Malaysia Airlines në një postim në Facebook, pak përpara se hipte në të. Cor ‘Pan’ Schilder nga Holanda ishte në mesin e 283 pasagjerëve që udhëtonin nga Aeroporti Schiphol i Amsterdamit për në Kuala Lumpur, më 17 Korrik të 2014-s.
33-vjeçari po shkonte në Malajzi për pushime sëbashku me të dashurën e tij 30-vjeçare, Neeltje Tol. E sigurisht duke qenë entuziast për pushimet që e prisnin, ai ndaloi para avionit Boeing 777-200ER për të shkrepur një fotografi në pistë.
Më pas e publikoi imazhin në Facebook me përshkrimin: “Nëse avioni zhduket, kishte këtë pamje”. Besohet se 33-vjeçari po bënte humor të zi, në referencë të Malaysia Airlines MH370, që u zhduk më 8 Mars të 2014-s, me 239 persona në bord.
Fillimisht miqtë e Cor e morën mesazhin e tij me humor dhe u përgjigjën po me humor. Por 7 orë më vonë, kur u përhap lajmi se një avion i Malaysia Airlines ishte goditur në fluturim në lindje të Ukrainës, miqtë e tij nisën të shqetësoheshin nëse avioni ishte ai që miku i tyre kishte postuar në rrjetet sociale.
Në këtë pikë u konfirmua se Con dhe e dashura e tij ishin në mesin e viktimave. 298 personat që ndodheshin në bord, 283 pasagjerë dhe 15 anëtarë të stafit, humbën tragjikisht jetën.
Avioni humbi kontaktet me kullën e trafikut ajror rreth 4 orë pasi ishte ngjitur në fluturim, 50 kilometra nga kufiri ruso-ukrainas. Avioni u rrëzua në zonën e Donetsk, një territor i kontrolluar nga separatistët.
Në Tetor të 2015-s autoritetet konkluduan se avioni ishte goditur nga një raketë ruse, duke bërë që të ndahej në dysh në ajër. Javën e shkuar, 4 persona u vunë nën akuzë për vrasje, për tragjedinë në fjalë. Gjyqi ndaj tyre pritet të nisë Marsin e ardhshëm në Hagë./
