Pas zjarreve duket se Shqipëria do të përballet edhe me lëkundjet sizmike. Të paktën kështu ka paralajmëruar kreu i Emergjencave Civile Shemsi Prençi gjatë një komunikimi me mediat.
“Shqipëria këtë vit rrezikohet edhe nga tërmetet, lëkundjet e para kanë nisur në rajonin e Elbasanit në Qukës” u shpreh Prençi.
Duke u ndalur tek situata e zjarreve të cilat kanë pushtuar një pjesë të mirë të territorit të vendit, Prençi shtoi se shërbimet pyjore nuk kanë njoftuar për zjarret, çka ka ndikuar që situata në disa raste të jetë edhe alarmante.
Ai shton se nëse flakët e zjarrit nuk arrijnë të neutralizohen që në fillim është e vështirë të luftohen, ndërsa koha kalon.
Prençi u ndal edhe tej zjarri i cili pak ditë më parë ra në malin e Dajtit , duke konfirmuar se flakët rrezikuan objekte shtetërore dhe antenat e televizionit. Për neutralizimin e flakëve ndërhyri një helikopter i cili vuri nën kontroll flakët.
Çfarë ndodhi nga tërmeti i 1967 në Shqipëri
Në Shqipëri janë regjistruar disa tërmete, por më i rëndi është ai i vitit 1967 në Librazhd dhe Dibër.
Në këtë zonë në vitin 1967 është regjistruar tërmeti me fuqi 6.6 ballë, që solli shkatërrime të mëdha.
Nga tërmeti u shkatërruan 177 fshatra, humbën jetën 12 persona dhe 174 të tjerë u plagosën.
Toka u ça në gjatësi mbi 10 kilometra, ndërsa pati zhvendosje vertikale të dheut deri në 50 centimetra./Shqiptarja
