Vdekja e 15‑vjeçarit Erjon Boba, i cili humbi jetën si pasojë e plagëve të marra nga goditja me thikë gjatë një sherri mes adoleshentëve në Durrës, ka rikthyer në vëmendje dhunën mes të miturve. Ngjarja tronditëse vjen vetëm pak kohë pas një rasti të ngjashëm, ku humbi jetën 14‑vjeçari Martin Cani.
Në një lidhje për emisionin “Në Kohë Reale” në RTSH, babai i Martin Canit, Engjëll Cani, shprehu dhimbjen e tij dhe kërkoi që drejtësia të vihet në vend për të dy fëmijët.
“Shpresoj që drejtësia për këta fëmijë të vihet në vend. Edhe ne shpresojmë shumë te drejtësia. Është aty ku thërret kiameti. Fëmijët janë e ardhmja. Kjo është shumë tragjike, jam shumë i tronditur. Është një botë shumë e padrejtë. Unë kam bërë protesta, kemi dhënë mesazhe që të bashkohemi në këtë kauzë. Unë e humba dritën e syve të mi dhe donim që rasti i Martinit të mos përsëritej më. Është shumë për të ardhur keq që nuk sensibilizohemi, sidomos shkolla duhet të jetë shumë vigjilente”, tha ai.
I tronditur nga ngjarja e fundit, Engjëll Cani tha se shoqëria dhe institucionet nuk kanë mësuar nga tragjedia e djalit të tij.
Cani ngriti shqetësimin e madh për sigurinë në shkolla, duke thënë se raste të mbajtjes së armëve nga nxënësit nuk janë të izoluara.
“Nxënësit nëpër shkolla mbajnë armë, nuk është rasti i parë i Martinit, ka shumë raste që nuk lajmërohen, nuk bëhen mediatike. Shkolla duhet të bëjë punë e vet, sepse po të ishte shkolla vigjilente dhe të njoftoheshin prindërit nuk do të ndodhte as ngjarja e Erjonit dhe as e Martinit. Duhet të ketë ura lidhëse mes shkollës-prindërit. Duhet bashkëpunim dhe një shoqëri vigjilente, por shoqëria më duket indiferente”, u shpreh ai.
