Vetëm pak ditë pas tërmetit shkatërrues që goditi Kolumbinë dhe la pas qindra viktima e mijëra të plagosur, Shakira ka vendosur të angazhohet drejtpërdrejt në ndihmën për zonat e prekura.
Këngëtarja me origjinë kolumbiane udhëtoi drejt provincës Chocó, ku vizitoi shkolla të dëmtuara, takoi nxënës dhe mësues dhe premtoi të kontribuojë në rindërtimin e të paktën 10 institucioneve arsimore, si edhe në restaurimin e një universiteti teknologjik.
“Nuk ka një mënyrë për të lehtësuar menjëherë dhimbjen e kaq shumë njerëzve, por ekziston angazhimi për të qëndruar pranë banorëve të Chocó-s”, u shpreh Shakira.
Për këtë nismë, artistja po bashkëpunon me filantropin Howard Buffett, ndërsa projektit i janë bashkuar edhe organizata të tjera. FIFA Global Citizen dhe Live Nation kanë dhuruar nga 500 mijë dollarë, ndërsa Banka e Zhvillimit të Amerikës Latine dhe Karaibeve ka kontribuar me 250 mijë dollarë.
Fondet do të përdoren për rindërtimin dhe riparimin e shkollave të dëmtuara, me synim që fëmijët të rikthehen sa më shpejt në mësim.
Shakira ka qenë prej vitesh e angazhuar në mbështetjen e arsimit në Kolumbi përmes fondacionit të saj, ndërsa pas tërmetit edhe artistë të tjerë latinë, mes tyre Marc Anthony, Karol G, Maluma dhe Sebastián Yatra, janë përfshirë në nisma bamirësie për komunitetet e prekura.
