Në një kohë kur pritet vendimi final i Komisionit të Venecias mbi ligjin e Vettingut, ambasadorët Donald Lu dhe Romana Vlahutin kanë zhvilluar një takim me kryetarin e Kuvendit, Ilir Meta. Takimi ka zgjatur rreth 60 minuta, në Kryesinë e Kuvendit, dhe në thelb të tij ka qenë reforma në drejtësi dhe vonesat e shkaktuara në zbatimin e ligjit të Vettingut.
Detajet e takimit i ka bërë të ditura vetë kryetari i Kuvendit, Ilir Meta, i cili u shpreh gjatë një komunikimi të shkurtër me gazetarët se, ligji i Vettingut është kusht për çeljen e negociatave.
“Në takim është diskutuar për vonesat në ligjin e Vettingut dhe reformën në drejtësi. Duhet të shpejtohet refoma. Ligji i Vettingut është kusht për integrimin e Shqipërisë në BE“, u shpreh Meta.
I pyetur për kërkesën e demokratëve për shkarkimin e Taulant Ballës nga kryetar i komisionit parlamentar hetimor për CEZ-in, Meta tha se do ta shikojë me vëmendje.
Sa i takon, reformës zgjedhore, Meta tha se është e vonuar.
