Partia Demokratike i ka bërë sërish thirrje mazhoracës dhe veçanërisht kryeministrit Edi Rama, që të tërheqë nga gara për Bashkinë e Elbasanit kandidatin Qazim Sejdini, pas publikimit të një videoje, ku ai kërcënon një gazetare se do ta heqë nga puna, nëse i bën pyetje bezdisëse.
Përmes deputetit Luçiano Boçi, tha se Rama duhet ta tërheqë Sejdinin pasi është një turp jo vetëm i Elbasanit por edhe i gjithë vendit.
Në video, Qazim Sejdini dëgjohet të thotë se ka hequr nga puna edhe një gazetar tjetër, sepse pronarin e televizionit e ka nën kontroll.
Më poshtë deklarata e plotë për mediat:
Partia Demokratike përshëndet reagimin e Ambasadës Amerikane, në krah të lirisë së medias, dhe që dënon kërcënimet. Reagimi i ambasadës amerikane vjen menjëherë pas skandalit të kandidatit të Edi Ramës për Elbasanin, i cili shantazhon gazetarin për pasoja të rënda nëse nuk bën atë që dëshiron Qazimi. Qazimi i njohur deri tani për ushtrimin e pushtetit për interesat e tij dhe të Edi Ramës, nga dje u pa botërisht, ashtu si elbasani e njeh, si një kërcënues dhe censor dhe arrogant i medias dhe fjalës së lirë. Në çdo vend normal të botës, ky lloj kandidati do të kishte mbajtur përgjegjësi, do të ishte tërhequr nga gara. Ai sigurisht nuk reflektoi. Po tani që reagoi mbarë opinioni publik dhe partnerët tanë, a do të mbajë përgjegjësi Qazim Sejdini? A do të reagojë Edi Rama, a do të bëjë ai çfarë do të ishte normale në këtë rast? A do ta tërheqë ai kandidaturën e Sejdinit, që pas skandalit të bërë publik, turpëron jo vetëm Elbasanin, por krejt vendin. Ne nuk kemi asnjë besim tek morali i Edi Ramës, por kemi bindjen e madhe se zgjedhësit e Elbasanit kanë edhe një arsye më shumë për ti treguar vendin korrupsionit e presionit ndaj fjalës së lirë, dhe për ti dhënë Elbasanit të gjithë së bashku pa asnjë dallim, frymëmarrjen, respektin dhe dinjitetin që meriton.
