Situata nuk duket e qetë në mazhorancë teksa kreu i LSI Ilir Meta, bëri një lëvizje të beftë duke propozuar një ‘qeveri besimi’, siç e quajti ai, por pa përmendur qeveri teknike. Teksa socialistët vijojnë të këmbëngulin për të mos lëshuar në qëndrim, LSI e Metës po shihet më pranë me opozitën.
Ndërkohë, ish-deputeti i PS Koço kokëdhima, i cili është mjaft kritik ndaj Ramës pas humbjes së mandatit, vijon axhendën e tij politike. Kokëdhima u takua me kryeparlamentarin Ilir Meta, me të cilin ka marrëdhënie mjaft të mira. Zyra e Kokëdhimës ka shpërndarë një deklaratë për takimin.
Deklarata:
Drejtuesi i lëvizjes ZGJIDHJA, Koço Kokëdhima, u takua sërish sot me kreun e Kuvendit dhe njëherësh kryetarin e LSI-së, Ilir Meta. Gjatë takimit 30 minutësh, të dytin brenda pak ditësh, u bisedua për aktualitetin politik dhe për rrugët e kapërcimit të krizës politike që po kalon vendi. Të dy bashkëbiseduesit theksuan sërish nevojën e dialogut mes palëve politike si dhe përsëritën qëndrimet e tyre se nuk mund të ketë zgjedhje parlamentare pa opozitën.
Drejtuesi i lëvizjes Zgjidhja, ashtu si dhe në javët e kaluara, është duke zhvilluar takime intensive me të gjithë drejtuesit e partive politiike në vend në kuadër të përpjekjeve për zgjidhjen e krizës politike ku është futur vendi pas nisjes së protestës së opozitës më 18 shkurt dhe këmbënguljes së qeverisë për të shkuar në zgjedhjet parlamentare të 18 qershorit edhe pa opozitën.
