Teksa ka porositur 1500 palë këpucë për efektivët e Gardës së Republikës në një kompani në Berat, ministria Brendshme mësohet të jetë në përfundim të një tenderi 113 milion lekë për ndryshimin uniformës së Gardës së Republikës.
Këto ndryshime vijnë vetëm pak muaj, pasi Policia e Shtetit ndryshoi tërësisht uniformën e saj. Mirëpo pas policisë shumë shpejt edhe efektivët e Gardës së Republikës do ndryshojë uniformat e tyre, ku pritet që në ditët në vijim të fillojë procesi i qepjes së kostumeve të reja.
Në këto uniforma janë të përfshira dhe qepja e gradave të reja, dhe emrit të efektivit dhe Gardës së Republikës, ku në dokumentacion specifikohet që shkronjat të mos fshihen gjatë përdorimit të uniformës.
Testi i fshirjes së gërmave
Pranimi i të gjithë sasisë të përcaktuar në kontratë dhe të dorëzuar në magazinën e porositësit do të bëhet vetëm në bazë të rezultateve që do të merren gjatë procesit të kolaudimit për të gjithë sasinë e produktit të gatshëm të dorëzuar në magazinë.
Teknikisht kolaudimi do të bëhet mbi bazën e rezultateve të flet-analizave laboratorike të lëshuara nga institucione të autorizuara,kryerjen direkt të matjeve dhe provave fizike të mostrave përfaqësuese të sasisë së mallit të dorëzuar dhe krahasimin e të gjitha këtyre rezultateve me kërkesat dhe të dhënat teknike të këtij specifikimi teknik,kampionit të ofruar dhe modelit të miratuar.
Ngjyra e gërmave nuk duhet të fshihet gjatë provës të fërkimit në të thatë dhe në të njomë me një copë të bardhë.Uniformat duhet të jetë simetrike në të gjithë elementët e saj.
1500 palë këpucë
Shumë nga punonjësit e Gardës së Republikës vuajnë nevojën e mungesës së këpucëve, jo vetëm atyre që përdorin në stërvitje por edhe të këpucëve që përdoren gjatë kohës kur ka ceremoni zyrtare të pritjes së personaliteteve të huaja. Pak ditë më parë Ministria e Punëve të Brendshme, mbylli procedurat e një tenderi për pajisjen me 1500 pale këpucë efektivët e Gardës së Republikës.
Zyrtarë të Gardës së Republikës thanë për gazetën “Shqiptarja.com” se këpucët janë zëri që mungon më tepër,megjithëse nevojitet dhe disa uniforma të reja, kryesisht ato verore. Sipas tyre, mungesa e këpucëve ka qenë një problem dhe se herë pas herë i është bërë kërkesa ministrisë, për blerjen e tyre.
Aktualisht kërkesa është miratuar dhe se ministria ka vendosur të derdhë në llogarinë e kompanisë së Blerina Kapedanit, një shifër financiare prej 36 milion lekë të vjetra.
Që prej disa ditësh, këpucët e reja të Gadrës së Republikës kanë filluar të qepen në kompaninë që administrohet nga Blerina Kapedani,në Berat.
Bëhet fjalë për 6 lloje, si këpucë me qafa stërvitje vere,këpucë me qafa stërvitje dimri,këpucë gjysma uniforme vere,këpucë gjysma uniforme dimri, atlete sporti dhe çizme motor çiklisti.
Garancia e këtyre këpucëve është 1 vjeçare dhe se kompania fituese merr përsipër zëvendësimin e këpucëve të dëmtuara gjatë përdorimit brenda afatit të garancisë për defekte që vijnë si rrjedhojë e proçesit teknologjik lëndëve të para e ndihmëse që përdoren.
