Pas përfundimit në një kohë rekord të hidrocentralit të Banjës, presidenti i kompanisë që ndërtoi veprën më të madhe hidrike në vend pas Komanit, duket se nuk kërkon të humbë kohë.
Christian Tonesen thotë se kompania e tij, “Statkraft”, është e gatshme të investojë në projekte të tjera në Shqipëri, por qeveria duhet të liberalizojë tregun e energjisë.
“Ne jemi duke investuar 500 milionë euro këtu. Përveç Banjës ne jemi duke ndërtuar një hidrocentral të dytë, atë të Moglicës. Ne duam të bëjmë më shumë, por kjo varet nga zbatimi i reformës në energji, që hap tregun”, ka deklaruar Tonesen për Top Channel.
Ndryshe nga hidrocentralet e tjera konçesionare, Banja nuk ia shet energjinë qeverisë, por privatëve në treg të lirë. Por Shqipëria ende nuk ka një bursë për tregëtimin e energjisë, ndërkohë që edhe nxjerrja e bizneseve nga rrjeti i furnizues i OSHEE-së po vonon.
“Sot ka një rregullore që na detyron ta eksportojmë të gjithë energjinë në vendet fqinje, kur në të njëjtën kohë Shqipëria importon energji po nga këto vende. Pra, në rregulloren e sotme ky nuk është një treg i lirë. Ajo që duhet të ndodhë është të na lejohet të shesim energjinë brenda vendit në mënyrë transparente dhe në përfitim të konsumatorëve”, ka theksuar Tonesen.
Vitin e kaluar, “Statkraft” realizoi 5.6 miliardë euro të ardhura globale, një shifër kjo gati dy herë me ë madhe se buxheti i Shqipërisë. Por këshilla që presidenti i saj ka për autoritete shqiptare, është miqësore.
“Ajo që duhet të bëhet këtu është një sistem ligjor më i fortë, institucione më të konsoliduara dhe reforma tregu”, sugjeron ai./tch/a.k
