Emigrantët shqiptarë që erdhën për të festuar Pashkët në Shqipëri, po përballen me vonesa në kufirin me Greqinë në rrugën e tyre të kthimit.
Në pikën e kalimit kufitar të Kapshticës, pala greke punonte me pak sportele dhe me ritme të ulëta, duke bërë që në pjesën shqiptare të krijohen radhë të gjata dhe emigrantët të qëndrojnë me orë të tëra në radhë.
“Erdha në Korçë për Pashkët dhe tani po kthehen sërish në Greqi, por po hasim në radhë të mëdha. Fajin nuk e ka dogana jonë, por ajo e grekut”, shprehet njëri prej emigrantëve.
Sipas të dhënave, pala shqiptare ka vënë në dispozicion të emigrantëve 4 sportele në dalje, ndërsa ajo greke ka punuar me tre të tilla, duke krijuar edhe vonesa të shumta në kontrollin e mjeteve.
Për më se 3 orë, emigrantë dhe qytetarë shqiptarë janë lënë mes temperaturave të ulëta në pikën e kalimit kufitar në pritje për të hyrë në shtetin helen.
“Asnjëherë nuk na ka ndodhur të kalojmë pa probleme në Greqi kur kemi ardhur për të festuar në vendin tonë. Radha është bërë diçka normale. Mundohemi të nisemi më herët që të kapim ditën tjetër për punë”, shprehet një tjetër emigrant./Tch/a.m.
