Gara për kreun e Federatës Shqiptare të Futbollit po ashpërsohet dita ditës, me akuza e kundër akuza nga kandidatët për president, shkruan SYRI.net.
Në daljet e tij nëpër media, kandidati Bashkim Fino ndër të tjera ka ngritur një çështje të “nxehtë”, ku ka kërcënuar me burg anëtarët me të drejtë vote në Asamble, që sipas deputetit socialist janë të ashtuquajtura “shoqata anonime”.
Menjëherë ka ardhur reagimi zyrtar i FSHF-së, që sipas saj çdo gjë është konform rregullores dhe statusit të këtij institucioni, por reagime ka patur edhe prej drejtues të këtyre shoqatave.
Njëri prej tyre, Sulejman Mema, i cili është kryetari i Shoqatës Rajonale Tiranë, ka reaguar ndaj deputetit socialist.
“Unë me burg të kërcënohem? Unë bëj pjesë te shtëpia ime. Normalisht futbolli është pjesë e familjes sime, është shtëpia ime. Më vjen keq që për këtë thënie. Me sinqeritet ju them se nuk më vjen mirë. Kërcënime të tilla për mua nuk ekzistojnë. Nuk është se jam i fortë, por di të them që jam me këllqe me kuptimin e mirë të fjalës dhe atë që bëj e bëj me koshiencë. Jam i bindur për atë që do të bëj, ose atë që kam bërë deri tani. Kam qenë gjithë jetës korrekt dhe tani vazhdoj të jem korrekt”, deklaroi ish-futbollisti i Tiranës (17 Nëntorit të atëhershëm) dhe i Kombëtares shqiptare.
Në videon e mëposhtme mund të dëgjoni deklaratën e plotë të Sulejman Memës, i cili sqaron funksionimin e shoqatës dhe tregon se do të votojë më 7 shkurt në zgjedhjet për presidentin e ardhshëm të FSHF-së. (Panorama)
