Lionel Messi i thotë mjaft Argjentinës, duke i dhënë fund aventurës me Kombëtaren albiceleste.
Kapiteni legjendar i “Albiceleste” ka vendosur të mos jetë më pjesë e përfaqësueses, duke mbyllur një kapitull historik që zgjati për më shumë se dy dekada (që nga 2005).
Por a mund të jetë kjo një tjetër strategji si e vitit 2016 kur u shkëput për disa muaj përkohësisht pas 2 finaleve të Copa America të humbura? Koha do e tregojë, pasi Messi vijon karrierën te Inter Miami ku ndodhet nën kontratë deri më 2028.
Kujtojmë se Argjentina e ka impenjimin e radhës më të rëndësishëm Copa America 2028 që do mbahet në SHBA, pra pas gati dy vitesh, ndërsa është e kualifikuar automatikisht për Botërorin 2030 dhe Messit nuk do i duhet të bëjë udhëtime të stërmundimshme për miqësoret dhe mund të marrë dy vite pauzë, edhe pas dhimbjes për humbjen e babait para kohe.
Lajmi ka shkaktuar reagime të shumta në botën e futbollit, pasi Messi konsiderohet jo vetëm një nga futbollistët më të mëdhenj të historisë, por edhe një prej figurave më të rëndësishme në historinë e Kombëtares argjentinase.
Messi debutoi me ekipin e parë të Argjentinës në vitin 2005 dhe që prej asaj kohe u shndërrua gradualisht në liderin kryesor të skuadrës.
Në 198 paraqitje, ylli argjentinas ka shënuar 116 gola, duke u bërë golashënuesi më i mirë në historinë e përfaqësueses dhe lojtari me më shumë ndeshje të zhvilluara me fanellën e Argjentinës.
Gjatë karrierës së tij ndërkombëtare, 39-vjeçari ka fituar Copa América në vitin 2021, Finalissiman në vitin 2022 dhe trofeun më të madh, Kupën e Botës në Katar në vitin 2022. Ai gjithashtu ka marrë pjesë në gjashtë edicione të Kupës së Botës, duke lënë gjurmë të rëndësishme në historinë e turneut.
Reagimi i Messit
“Pas gjithë kësaj kohe që nga finalja dhe pasi e kam menduar shumë, dua t’ju njoftoj të gjithëve se po tërhiqem nga Kombëtarja”, shkruan Messi.
“Ka qenë një vendim që më ka dhembur dhe ende më dhemb thellë brenda meje, por e kuptoj se ky është momenti i duhur.”
Kapiteni i Argjentinës thekson se gjatë gjithë karrierës së tij me kombëtaren ka dhënë gjithçka për fanellën e vendit të tij, jo vetëm gjatë viteve të fundit, kur Argjentina arriti sukseset më të mëdha, por edhe në periudhat më të vështira.
“Betohem se gjithmonë kam dhënë gjithçka, jo vetëm në këto vitet e fundit kur fituam gjithçka, por edhe më parë. Gjithmonë kam luftuar dhe kam dhënë gjithçka për këtë fanellë, për t’ju sjellë lumturi dhe për t’ju bërë krenarë që jeni argjentinas përmes futbollit”, shprehet ai.
Messi pranon se koha po kalon dhe se karriera e tij ndërkombëtare po i afrohet fundit.
“Nuk ka mbetur shumë kohë dhe kapituj të ndryshëm po mbyllen. Ky është një kapitull që më dhemb shumë. E dua, e kam dashur dhe do ta dua gjithmonë të qenit pjesë e Kombëtares. Kam dhënë gjithçka që kisha dhe nuk kam më shumë për të dhënë.”
Ylli argjentinas thekson gjithashtu se një brez i ri lojtarësh po vjen dhe meriton të ketë hapësirën e tij në përfaqësuese.
“Ka edhe shumë lojtarë të rinj dhe të talentuar që po vijnë dhe që e meritojnë të jenë këtu.”
“Tani do të jem një prej jush”
Messi ka falënderuar tifozët argjentinas për mbështetjen e jashtëzakonshme gjatë 20 viteve të tij me Kombëtaren.
“Faleminderit për gjithë dashurinë gjatë këtyre 20 viteve. Do të më mungojë t’ju dëgjoj nga brenda. Tani do të jem një prej jush, gjithmonë duke mbështetur nga jashtë, në momentet e mira dhe akoma më shumë në ato të këqija.”
Ai ka pasur gjithashtu një falënderim të veçantë për familjen, trajnerët, shokët e skuadrës dhe drejtuesit me të cilët ka bashkëpunuar gjatë këtij rrugëtimi.
“Faleminderit familjes sime që ka qenë gjithmonë aty për mua dhe që më ka shoqëruar gjatë këtij rrugëtimi të bukur, por edhe të vështirë. Faleminderit çdo trajneri, shoku skuadre dhe drejtuesi me të cilët pata mundësinë ta ndaj këtë përvojë. Me vete marr kujtime dhe momente të paharrueshme.”
Messi largohet nga Kombëtarja me krenari për atë që ka arritur me Argjentinën, sidomos pas viteve të lavdishme në të cilat fitoi trofetë më të rëndësishëm.
“Largohem i qetë dhe krenar, duke e ditur se së bashku me shokët e skuadrës ju dhamë momente që dikur i kishim ëndërruar. Ishte çmenduri ta përjetoja gjithë këtë me ju. Ju dua!”
Në fund, Messi ka falënderuar edhe Zotin për mundësinë që i dha të lindte argjentinas.
“Faleminderit Zotit që më bëri argjentinas. Vamos Argentina!”
“Pas asaj që ndodhi me babain tim, jam edhe më i bindur”
Në mesazhin e tij, Messi zbulon se vendimin për t’u tërhequr e kishte marrë vetëm dy ditë pas finales.
“I shkrova këto fjalë më 21 korrik, dy ditë pas finales. Sot, pas asaj që ndodhi me babain tim, jam edhe më i bindur për këtë vendim sesa më parë.”
Kështu, pas 20 vitesh me Kombëtaren e Argjentinës, një prej kapitujve më të mëdhenj në historinë e futbollit duket se po shkon drejt fundit.
