Ambasadori i Shteteve të Bashkuara të Amerikës, Donald Lu pas seancës së Kuvendit ku kryeministri Edi Rama prezantoi programin e qeverisë së re, për katër vjeçarin e ardhshëm është parë në kafe me ambasadoren e Greqisë, Eleni Surani.
Nuk dihet nëse Lu ka zgjedhur të takojë diplomaten greke pas fjalëve të prera të kryeministrit Edi Rama se Shqipëria nuk ka për të mbyllur gojën e sytë për të drejtat e veta, apo është thjesht një rastësi.
Fotot ku duken Lu e Surani, teksa bisedojnë janë publikuar nga BalkanWeb.
Kujtojmë se kryediplomati amerikan nuk ishte i pranishëm gjatë seancës kur Gramoz Ruçi u zgjodh Kryetar Parlamenti, por nuk mungoi sot në sallë, për të dëgjuar programin e qeverisë së re.
Deklarata e Ramës:
“Bashkim doganor me Kosovën dhe zero probleme me fqinjët. Mesazhi im për Greqinë është i thjeshtë; duam miqësi dhe respekt dhe bashkëpunim.
Cdo grek që jeton në Shqipëri është i barabartë dhe minoriteti është një urë e vyer mes dy vendeve dhe popujve, kujdesi i qeverisë vetëm do të vijojë të rritet.
Por Shqipëria, pavarësisht halleve nuk do të mbyllë as sytë dhe as gojën në mbrojtje të vërtetave të veta. Koha do të sjellë zgjidhjet për të dyja palët, me këmbë në tokë, jo deklarata fluturake në distancë. Nivel i ri marrëdhënies miqësie dhe bashkëpunimi”. /b.d
