Gjiganti kinez i telefonisë “Huawei”, kthyer tashmë në numrin dy botëror të smartfonëve duke lënë pas Apple shfaqi sot ambicien për të lënë pas Samsung, që mban vendin e parë, deri në vitin 2019, pavarësisht një mungese të ndjeshme në tregun amerikan.
“Është e padiskutueshme që ne do të jemi në vend të dytë të shitjeve botërore të smartfonëve vitin e ardhshëm. Madje është e mundur që ne të jemi edhe numri një në tremujorin e katërt të vitit 2019”, theksoi Richard Yu, kreu i degës së produkteve të konsumit të grupit.
“Këto gjashtë muajt e fundit kanë qenë të pabesueshme”, shtoi ai për shtypin në selinë e Huawei-t në Shenzhen.
Huawei ka shitur rreth 95 milionë smartfonë në gjashtëmujorin e parë të vitit, një rritje me rreth 30% në një vit dhe pritet të tejkalojë objektivin e saj fillestar prej 180 milionë telefonësh të shitur në vitin 2018.
“Për herë të parë, Huawei ka kryesuar në tremujorin e dytë dyshen Apple-Samsung, që dominon që prej tetë vitesh tregun botëror”, sipas një studimi të kabinetit IDC.
“Koreano-jugori Samsung ka shitur 71,5 milionë telefona nga prilli në qershor, ndjekur nga Huawei 54,2 milionë telefonë”, sipas llogaritjeve të “International Data Corporation”.
Gjiganti kinez ka kryesuar gjithashtu amerikanin Apple me 41,3 milionë iPhone të shitura.
/ATSH/b.d
