Pas largimit të deputetit Agron Duka, në Partinë Republikane largohet edhe një tjetër. Bëhet fjalë për Alfred Deshatin, nënkryetarin e PR-së, i cili ka dhënë dorëheqjen.
Tashmë Partia Republikane përfaqësohet vetëm nga kryetari i saj Fatmir Mediu. Kujtojmë që në zgjedhjet e 2013, Partia Republikane fitoi 5 vende deputeti dhe tashmë ka vetëm një.
Akti i dorëheqjes
Lënda: Letër dorëheqje Tiranë, më 27/04/2016
Drejtuar: Fatmir Mediu, Kryetar
Partia Republikane e Shqipërisë
Për dijeni: Kryesia
Partia Republikane e Shqipërisë
Për 25 vite kam punuar për Partinë Republikane duke e konsideruar si një çështje krenarie dhe kënaqësie për veten dhe familjen time. Besoj se kam punuar mjaftueshëm për të kuptuar trajektoren e kulturës, njerëzve dhe identitetin e Partisë Republikane.
Fleksibiliteti i mjedisit politik në Shqipëri dhe jo vetëm të ofron gjithmonë alternativa, por unë e kam parë Partinë Republikane si zgjedhjen time të vetme, në kontekstin që i jam dedikuar plotësisht duke kontribuar me sinqeritet dhe besim.
Një Parti e shokëve dhe miqve të mirë e të bashkuar, është kthyer në një Parti në luftë me veten. Për shumë kohë e kam gjetur veten në situata të vështira dhe jo komode duke mos u pajtuar me mënyrën aktuale të funksionimit dhe vendimarrjes së partisë, ashtu edhe drejtimin në të cilën ajo po shkon.
Nuk e kam më ndjesinë e dikurshme të partisë idealiste të krijuar nga z. Sabri Godo, shqetësimi i të cilit ishte vendi dhe njerëzit e tij. Ndërsa sot, shumica e liderëve tanë janë të shqetësuar në lidhje vetëm me axhendat e tyre personale. Rrjedhimisht, kam vendosur të dorëhiqem nga pozicionet aktuale partiake, respektivisht, nga pozicioni i N/Kryetarit të Partisë Republikane, anëtarit të Kryesisë dhe anëtar i kësaj partie.
