Pavarësisht hulumtimeve të deritanishme që tregojnë se mbi 80 për qind e qytetarëve të Maqedonisë janë pro anëtarësimit të vendit në Bashkimin Evropian, Lëvizja Popullore për Maqedoninë vlerëson se pas largimit të Britanisë nga BE-ja, orientimi i qytetareve duhet të konfirmohet edhe përmes referendumit.
Drejtuesit e kësaj partie minore kanë dorëzuar në Kuvend një iniciativë për organizimin e referendumit dhe kanë kërkuar që e njëjta të procedohet nga deputetët.
“Nëse parlamenti nuk e pranon kërkesën tonë do të ketë fazë të dytë dhe do ta shfrytëzojmë mundësinë tjetër që e jep ligji, do të organizojmë fushatë për mbledhjen e 150 mijë firmave nga qytetarët për ta obliguar Parlamentin që të shpallë referendumin”, tha lideri i LPM-së Janko Baçev.
Por, deputetët e LSDM-së e shohin si të panevojshme këtë iniciativë, pasi thonë se pjesa dërrmuese e qytetarëve në shumë raste përmes sondazheve janë shprehur pro anëtarësimit të vendit në BE.
“Nuk është e nevojshme të prononcohen qytetarët sepse popujt në Maqedoni ka kohë që janë prononcuar për të këtë alternativë që është e vetmja për këtë shtet nëse është përcaktuar për prosperitet dhe zhvillim demokrati”, deklaroi Tomislav Tuntev, deputet i LSDM-së.
Lëvizja Popullore për Maqedoninë vlerëson se partitë politike që nga viti 1991 kanë krijuar bindje të rrejshme se anëtarësimi në BE garanton stabilitet. Sipas këtij subjekti, siguria e vendit varet nga zgjidhja e problemeve të brendshme, citohet Alsat-M. (b.an)
