6 vite pas Brexit-it, marrëdhëniet tregtare mes Gjermanisë dhe Mbretërisë së Bashkuar janë stabilizuar, sipas ministres gjermane të Ekonomisë, Katherina Reiche.
Duke folur në një konferencë ekonomike gjermano-britanike në Berlin, ajo tha se Mbretëria e Bashkuar është rikthyer ndër 10 partnerët kryesorë tregtarë të Gjermanisë. Sipas saj, në vitin 2025, volumi i tregtisë mes dy vendeve ka arritur rreth 118 miliardë euro. Gjermania ka importuar rreth 33 miliardë euro mallra nga Britania, ndërsa ka eksportuar rreth 80 miliardë euro drejt saj.
Ajo u shpreh se lidhjet ekonomike mes dy vendeve janë “të qëndrueshme dhe reale”, duke shtuar se ekziston potencial për thellim të mëtejshëm të tyre.
Sipas saj, krizat e viteve të fundit kanë treguar se tregjet globale nuk funksionojnë më në mënyrë të automatizuar, duke përmendur edhe tensionet e fundit në Ngushticën e Hormuzit si shembull të paqëndrueshmërisë ndërkombëtare.
Gjermania dhe Mbretëria e Bashkuar, sipas ministres, ndajnë interesa të përbashkëta në fusha si tregtia, teknologjia dhe siguria e zinxhirëve të furnizimit, veçanërisht në lëndët e para kritike. Ajo theksoi gjithashtu nevojën për një kornizë të re bashkëpunimi pas daljes së Britanisë nga Bashkimi Europian, duke qenë se BE-ja nuk shërben më si platformë e përbashkët.
Nga ana e tij, ministri britanik i Ekonomisë Peter Kyle deklaroi se po synohet një thellim i mëtejshëm i marrëdhënieve ekonomike, përfshirë edhe bashkëpunimin në prokurimin e metaleve të rralla. Ai e cilësoi këtë moment si një “shans të jashtëzakonshëm” për rindërtimin e marrëdhënieve mes dy vendeve.
Bashkëpunimi i ri bazohet në një marrëveshje të nënshkruar në korrik 2025, e cila parashikon forcimin e marrëdhënieve në fushat e mbrojtjes, sigurisë, ekonomisë, shëndetësisë dhe kulturës.
Britania e Madhe u largua zyrtarisht nga Bashkimi Evropian më 31 janar 2020, ndërsa tregu i përbashkët u braktis në fund të atij viti, pas referendumit të vitit 2016./ Marrë nga DW
