Ish-kryeministri i Shqipërisë, Sali Berisha, ditë më parë akuzoi shtetasin amerikan Fred Abrahamsin, hulumtues në “Human Rights Watch”, si “agjent të [Shërbimit të Sigurimit Shtetëror të Serbisë] UDB-së”.
Ndaj kësaj deklarate, menjëherë reagoi vet i përmenduri Abrahams, i cili përmes një letre të botuar në gazetën “Dita” në Shqipëri, përveç se i cilësoi si të pabaza akuzat e Berishës, tha se nëse ky i fundit ka fakte, duhet t’i paraqes ato para autoriteteve amerikane “pasi kjo do të përbënte edhe shkelje të ligjit amerikan”.Ndërkaq, në mbrojtje të Abrahamsit ka dalë edhe Agron Bajrami, kryeredaktor i gazetës “Kohës Ditore”, i cili e njeh nga afër veprën e Abrahamsit.
Ai ka tërhequr vërejtjen se Abrahams është nga më meritorët për ekspozimin e krimeve të Millosheviqit në Kosovë, “kur pak kush në botë çante kokën për krimet dhe represionin që bëhej në Kosovën nën pushtimin serb”, raporton Koha.net.
“Derisa Kosova ka dështuar deri tash ta njohë zyrtarisht kontributin e tij në luftën për të drejtat e popullit të Kosovës, më e pakta që vendi duhet të bëjë përballë sulmeve të tilla të ulëta e shpifëse kundër tij është që t’i dal në krah”, është shprehur Bajrami në një postim në Facebook.
Ky është postimi i plotë i kryeredaktorit të “Kohës Ditore”:
Fred Abrahams është ndër ata persona të rrallë, të huaj a shqiptarë, që kanë dhënë kontributin qenësor në ekspozimin e krimeve të Milosheviqit dhe regjimit serb në Kosovë gjatë viteve ’90-të.
Si hulumtues i Human Rights Watch, ai ka bërë publike faktet e pakontestueshme për masakrat e shumta që ushtria e policia serbe i kanë kryer në Kosovë, të cilat botës ia treguan të vërtetën për atë që po ndodhte gjatë luftës në Kosovë. Për këtë, Fred edhe dëshmoi në Gjykimin kundër Milosheviqit në Hagë.
Fred është ndër ata amerikanë dhe perëndimorë që hapur u vunë në anën e shqiptarëve të Kosovës kur pak kush në botë çante kokën për krimet dhe represionin që bëhej në Kosovën nën pushtimin serb.
Dhe, derisa Kosova ka dështuar deri tash ta njohë zyrtarisht kontributin e tij në luftën për të drejtat e popullit të Kosovës, më e pakta që vendi duhet të bëjë përballë sulmeve të tilla të ulëta e shpifëse kundër tij (dhe Fron Nazit), është që t’i dal në krah.Ashtu si Fredi na doli në krah gjithë ne, kur ishte më së vështiri, përgatiti Koha. (b.an)
