Nga Carlo Bollino
Pas 28 vitesh të kaluara në Zërin e Amerikës, që nga sot kolegu Armand Mero merr drejtimin e informacionit në Report Tv dhe Shqiptarja.com. Për mua është një rikthim i madh, njerëzor dhe personal përpara se të jetë profesional, sepse Armandi ka qenë ndër shqiptarët e parë (bashkë me kolegen Brikena Cani) që më qëndroi pranë që nga marsi 1991, kur erdha në Tiranë si i dërguar i ”La Gazzetta del Mezzogiorno” për të ndjekur zgjedhjet e para pluraliste, dhe prej asaj kohe ka mbetur një mik i shtrenjtë.
Ai ishte në krahun tim në vitin 1993, kur ideova krijimin e “Gazeta Shqiptare” (ku ka qenë edhe kryeredaktor), e para gazetë e përditshme me frymëzim europian që u lind në Shqipëri pas 45 vitesh izolimi komunist. Ishte pranë meje kur projektova Balkanweb, portali i parë informativ në gjuhën shqipe, si dhe News24, i pari televizion informativ “all news” në vend. Ishte me mua edhe në momentin e krijimit të zyrës së agjencisë së lajmeve italiane ANSA në Tiranë, me të cilën ai vazhdon të bashkëpunojë. Së bashku kemi ndjekur tragjedinë e ’97, luftën në Kosovë dhe qindra ngjarje të tjera politike dhe aktualitet ndër vite.
Pastaj rrugët tona u ndanë: pasi ai nisi impenjimin me Voice of America dhe pronarët italianë shitën Balkanweb dhe News24, unë u largova përkohësisht nga Shqipëria. Megjithatë, kontaktet tona nuk u ndërprenë kurrë. Sot, më në fund, rikthehemi të punojmë sërish bashkë në krye të grupit mediatik të ri që themelova.
