Banorët e tre pallateve në Durrës janë pajisur me certifikatën e pronësisë pas pritjes prej rreth 20 viteve. Drejtori i Përgjithshëm i Kadastrës, Artan Lame u shpreh se kjo vonesë është për shkak të ndërtuesve.
“Janë tre pallate, kanë gati nga 15-20 vjet që presin. Duket e tmerrshme që presin prej 20 vjetësh, por procedura e legalizimit të pallateve i ka kaluar Kadastrës vetëm në vitin 2019 dhe ajo që kemi kërkuar ne ka qenë gjithmonë bashkëpunimi me banorët atje ku subjektet nuk përgjigjen”.
Ashtu sikurse në gjithë vendin edhe në Durrës theksoi Lame kemi të bëjmë me subjekte që i kanë braktisur qytetarët.
“Në shumë raste kemi të bëjmë me subjekte totalisht të papërgjeshme. Në disa raste ka subjekte të përgjegjshme të cilët vijnë dhe i ndjekin procedurat me drejtorinë. Por në shumë raste subjekti e ka braktisur dhe nuk do të dijë fare se çfarë bëhet dhe banorët vijnë vërdallë prej vitesh e vitesh”.
Kreu i Kadastrës kishte një thirrje për Bashkitë sa i përket lejeve të ndërtimit.
“Bashkive në përgjithësi dhe në mënyrë të veçantë në rastin konkret, bashkisë Durrës që nuk mund të vazhdohet subjekte që janë ende aktive të aplikojnë nëpër bashki e të marrin leje ndërtimi kur kanë lënë mbrapa vetes halle të tilla me qytetarët”.
Për shkak të vështirësive që ndeshin qytetarët me regjistrimin e pronave të tyre, në Kadastrën Shqiptare mbërrijnë qindra ankesa nga papërgjeshmëria e ndërtuesve.
/a.r
