Nuk ka fitues në supersfidën mes Partizanit dhe Skënderbeut, që ka mbyllur javën e 12-të të kampionatit të Kategorisë Superiore. Pavarësisht tentativave nga të dy kampet, barazimi pa gola ka mbetur i pandryshuar deri në vërshëllimën e fundit të arbitrit. Në përfundim të javës së 12-të, Skënderbeu mban i pashqetësuar kreun e klasifikimit në +6 pikë ndaj Kukësit të vendit të dytë, duke ruajtur gjithashtu rekordin pozitiv të pathyeshmërisë. Në kampin e kuq, barazimi dhe pika e siguruar përballë kryesuesve, për më tepër e shoqëruar edhe nga performanca pozitive, mund të konsiderohet një vijim i kthesës së nisur një javë më parë. Gjithsesi të pandryshuara mbeten pozitat e Partizanit në klasifikim, duke u renditur në vend të 6-të me 15 pikë, po aq sa Laçi dhe Teuta.
E nisur me 1 minutë heshtje për nderim të një tifozi të Partizanit që ka humbur jetën në mënyrë të parakohëshme, supersfida e javës së 12-të ka emocionuar që në fillim. Ishin pikërisht të kuqtë, të cilët edhe pse pa trajnerin e tyre, Sulejman Starova, i dënuar për të mos e ndjekur ndeshjen nga pankina, kanë kaluar në avantazh që në minutën e 4’, por goli është anulluar nga arbitri për pozicion jashtë loje. Përgjigja e korçarëve është regjistruar në të 20’, kur fillimisht Sowe, më pas James kanë patur të gjitha mundësitë për të kaluar Skënderbeun në avantazh, por pa saktësi në finalizim.
Të kuqtë kanë vijuar të presojnë dhe të ushtrojnë një lojë me nota më të forta ofensive, duke tentuar në disa raste edhe me goditje nga jashtë zone, sikurse në rastin e Bathës, në të 39’, kur provoi me një gjuajtje të fuqishme, por pret Shehi në dy kohë, ashtu edhe në pjesën e dytë, me Hasanin, por gardiani veteran i korçarëve ka neutralizuar rrezikun. Shansi më i mirë për të kuqtë është regjistruar në të 66’, kur Lorenc Trashi ka shpërdoruar një super mundësi për të kaluar të kuqtë në avantazh, kur pas krosimit të Ibrahimit, nuk ka shënjestruar portën. Një tjetër mundësi e artë është shpërdoruar në minutën e 3’ shtesë nga Sukaj, që pranë pikës së penalltisë ka dorëzuar topin në duart e Shehit.
Partizani-Skënderbeu 0-0
Partizani: Hoxha, Ibrahimi, Atanda, Malota, Kalari, Batha, Vila, Asani, Trashi, Progni, Bardhi.
Trajner: Klevis Dalipi
Skënderbeu: Shehi, Taku, Radas, Aliti, Mici, Muzaka, Osmani, Lilaj, Gavazaj, James, Sowe.
Trajner: Ilir Daja
Arbitër: Eldorjan Hamiti
/Telesport.al
