Priste të kishte përballë Skënderbeun, skuadër për të cilën kishte nisur të mbildhte informacione prej kohësh, por UEFA vendosi që në vend të kampionëve të Shqipërisë në Champions do të luante Partizani. Trajneri i Ferencvaroshit, Thomas Doll gjithsesi tregoi në konferencën për shtyp para ndeshjes se ka marrë informacione të mjaftueshme edhe për të kuqtë.
“Isha në Gjermani për të ndjekur Skënderbeun në miqësoren me Karabagun, por pastaj UEFA vendosi që kundërshtari ynë do të ishte Partizani, një klub me shumë emër këtu në Shqipëri. Edhe pse ishte një vendim i cuditshëm, unë mbetem i përqendruar të skuadra ime. E kam ndjekur ndeshjen e Partizanit me Slovan Bratislavën, di që ka ardhur një trajner italian ndërsa pak ditë më parë një sulmues”.
Doll nuk bën llogari për barazimin në “Elbasan Arena”, ai thekson se në futboll luhet vetëm për të fituar.
“Nuk më pëlqen që skuadra ime të futet në fushë për një rezultat tjetër veç fitores. Nëse do të na jepet mundësia për të fituar, do të fitojmë. Duhet të jemi të përqendruar pasi disa lojtarë kanë qenë të grumbulluar me kombëtaren në Europian dhe janë bashkuar vetëm ditët e fundit me ekipin”.
Kapiteni i Ferencvaroshit, Adam Pinter as që e mendon eliminimin nga Partizani, pasi dështimi ndaj të kuqve do të ishte një goditje e rëndë për kampionët e Hungarisë.
“Duhet të luajmë dy takime dhe nëse nuk kualifikohemi, do të ishte një dështim i madh jo vetëm për ne por për të gjithë opinionin sportiv në vendin tonë. Ne jemi të bindur se do të marrim rezultat pozitiv që në takimin e parë”.
