Partizani realizoi për herë të parë kualifikimin e një raundi në Ligën e Kampioneve dhe shpërblimi do të jetë gjithashtu rekord. Drejtuesit e klubit paralajmëruan se në rast se siguronin “biletën” për ndeshjen e radhës, shpërblimi do të ishte prej plot 250 mijë eurosh.
Panorama Sport zbulon se presidenti Demi e ka shtuar sërish shifrën duke e çuar në 300 mijë euro. Në fakt, është saktësuar që kjo vlen vetëm për lojtarët, çka bën që të sigurohet një shifër prej afro 15 mijë eurosh për titullarët mesatarisht.
Pas triumfit, u lajmërua se mund të ketë edhe një rritje të këtij shpërblimi. Por, nga ana tjetër klubi i kuq siguroi 400 mijë si premio nga UEFA. Ndeshja e radhës do të jetë ndaj gjigantëve austriakë të Salzburgut, duke nënkuptuar një pengesë të vështirë për t’u kualifikuar.
Rrjedhimisht, edhe shpërblimi për futbollistët do të jetë më i madh, po aq sa edhe sasia e parave që përfiton arka e Partizanit nëse ia dalin të kualifikohen sërish. Duke qenë se përfitojnë 3 milionë euro po eliminuan Salzburgun, futbollistët e kuq duhet të përgatiten për një premtim tjetër rekord…
PS/d.i.
