Në një “Qemal Stafa” të mbushur si rrallë ndonjë herë që prej orës 18:30 nga mjaft sportdashës, në një atmosferë të veçantë mbushur plot me emocione dhe koreografi nga tifozët “bardh e blu” dhe ata të “kuq”, u zhvillua të shtunën në mbrëmje edhe derbi i kryeqytetit “Partizani-Tirana”.
Ndeshja e vlefshme për javën e 6-të të Super Ligës së futbollit në vend, derbi i 143-të midis Partizanit dhe Tiranës përfundon me rrjeta të paprekura në pjesën e parë dhe 2 minutat shtesë të akorduara nga gjyqtari i katërt.
Sulejman Strarova, trajneri i “Demave të Kuq” të Partizanit në formacionin 4-1-4-1 solli si titullarë futbollistët Hoxha, Bicaj, Krasniqi, Ibrahimi, Kalari, Daja, Batha, Trashi, FejzulLahu dhe Mazrekaj
Ndërkohë që Shkëlqim Muça trajneri i “bardh e bluve” të Tiranës iu përgjigj me një 4-2-3-1 me futbolllistët Frashëri, Smaili, Muça, Karan, Hoxhallari, Teqja, Karabeci, Fukui, Vucaj, Lika dhe Bakaj.
15 herë kampionët e vendit, Partizani, dhe 24 herë kampionët e vendit, Tirana gjatë 45 minutëshit të pjesës së parë edhe pse treguan se nuk ju mungonte dëshira për të realizuar golin e shumëkërkuar, nuk arritën dot të konkretizonin rastet, dhe gjithashtu në të dyja kampet dukej sikur mungonte pak freskia e futbollistëve apo edhe fantazia e tyre.
I vetmi spektakël në Stadiumin “Qemal Stafa” ishte ai i dhuruar nga ana e dy tifozerive të klubeve, të cilat populluan dhe mbushën stadiumin 2 orë përpara ndeshjes.
Me fillimin e pjesës së dytë, i përhershmi Xhevair Sukaj në minutën e ’50 ndryshon fatin dhe rezultatin e ndeshjes me anën e golit të realizuar prej tij, gol ky që bëri që tifozat e “Demave të Kuq” të Partizanit të ndiznin në flakë “Qemal Stafën” me anën e flakadanëve.
Menjëherë pas golit të realizuar nga Sukaj, Muça kryen dhe zëvendësimin e parë për Tiranën ku Lika lë fushën e blertë për brazilianin Gilberto.
Ndërkohë që në minutën e ’63, Starova kryen zëvendësimin e dytë ku Kërçiku largohet nga fusha e blertë për Vuçaj.
Starova i përgjigjet Muçës me një zëvendësim në minutën e ’72 ku për Partizanin largon pikërisht autorin e golit të vetëm të takimit, Xhevair Sukaj për Stevan Racic.
Erion Hoxhallari për Erion Kadriun në minutën e ’76 është zëvendësimi i tretë dhe karta e fundit që Muça luan për fatin e takimit.
Mentor Mazrekaj për Marko Vidovic është edhe zëvendësimi i radhës së Starovës në minutën e ’90.
Sakaq, edhe në 5 minutat shtesë të akorduara nga gjyqtari i 4-tërt, pas përfundimit të 90-minutëshit të kohës së rregullt, portieri i Partizanit Alban Hoxha nuk lejoi të ndodhte asnjë surprizë, duke grushtuar disa gjuajtje në portën e tij.
Partizani me anën e kësaj fitore ngjitet në vendin e parë me 16 pikë të fituara në 6 ndeshje të zhvilluara.
