Ervis Iljazaj, pedagog i shkencave politike, i ftuar në studion e News24, ka analizuar situatën politike në vend dhe afrimin e zgjedhjeve të 11 majit.
Ai u shpreh se vendimet e marra së fundmi nga qeveria, duke nisur që nga shpërblimet e fundvitit, bonusi i pranverës apo edhe vendimi i bërë publik sot për uljen e çmimit të energjisë, janë marrë në kuadër të fushatës elektorale.
“Ka disa vendime të fundit të qeverisë mbajnë aromë zgjedhjesh si rritja e rrogës, bonusi për pensionistët. Nuk di efektet financiare që kanë në buxhet. Për arsye politike apo jo, nëse përfitojnë qytetarët le të marrim anën e mirë. Zakonisht qeveritë në këto periudha e “hapin thesin” por për sa kohë që përfitojnë qytetarët, le të përfitojnë. Megjithatë shpesh qytetarët nuk ndikohen vetëm nga një gjë për të hedhur votën.
Ka një variabël gjerash.
Njëri që ka votuar gjithmonë PD nuk voton majtas edhe nëse i ulet çmimi i energjisë. Pjesa që ndikohet është shumë e vogël
Kjo është një lloj inxhinierie elektorale që qeveritë e bëjnë. Është shumë naive të besosh që e gjithë kjo nuk ka të bëjë me periudhën elektorale”, tha ai.
Iljazaj foli edhe në lidhje me votën e diasporës që e quajti një faktor përcaktues për rezultatin e zgjedhjeve.
“Vota e diasporës për mua do të jetë përcaktuese për të zgjedhur pushtetin e vitit 2025. Janë dy Shqipëri që votojnë, janë thuajse i njëjti numër votues si brenda ashtu edhe jashtë vendit. Çështja është se sa do të jetë e gatshme diaspora të votojë.
Opozitën e shoh më në disavantazh”, ka sqaruar ai.
Ndërsa sa i përket kreun e PL Ilir Meta, i cili ndodhet në qeli dhe kryetarit të PD Sali Berisha i cili qëndroi për rreth një vit nën masën e sigurisë “Arrest Shtëpie”, ai u shpreh se kjo ka ndikimin e saj, pasi PD për një vit ka humbur takimet e liderit në terren.
“Partitë në Shqipëri janë parti njeri, dhe fati i partisë lidhet me fatin e liderit të saj”, tha ljazaj.
