Kryetari i partisë ‘Mundësia’, Agron Shehaj iu përgjigj akuzave të Flamur Nokës, i cili tha se “Mundësia” është një “partiçkë e regjimit”.
Sipas Shehajt sulmet që i bëhën nga sekretari i Përgjithshëm i PD, Flamur Noka vijnë pasi ai ka denoncuar “vjedhjen që po bëhet në rrugën Thumanë-Kashar”.
Shehaj thekson se kjo rrugë duhet të kushtonte vetëm 60 milionë, por kostoja ka shkuar në 1.3 miliardë euro.
“Sulmi vjen pas debatit në Kuvend. Ne po denoncojmë se në rrugën Thumanë-Kashar po bëhet korrupsion masiv dhe pas kësaj, Flamur Noka më sulmon me shpifje pas denoncimeve. Të gjithë e dimë se Flamur Noka është afër me një biznesmen të njohur.
Shqiptarët do të paguajnë 1.3 miliard euro për vetëm 20 km rrugë. Këtij biznesmeni ia kanë dhënë koncesionin, sepse do i ndajnë paratë me njëri-tjetrin, jo se është burrë i mirë. Sapo flas për këtë skandal, del Noka e flet kundër meje”, tha Shehaj në News24.
I pyetur nëse është e vërtetë që kompania e tij ka ndërtuar shtëpinë e bashkëshortes së Veliajt, Ajola Xoxës, Shehaj deklaroi se edhe kjo është shpifje.
“Është shpifje. Është shpifje që unë gjoja kam ngrënë dreka e darka me Veliajn. Kanë marrë vesh që kam mbaruar universitetin në Firenze dhe vetëm shpifin. Shpifjet janë, që unë të ndalem në denoncime, që ata nuk duan të jetë si denoncim. Si mund ta vërtetoj unë se kam ngrënë drekë a darkë apo jo me vëllain e Veliajt?
Ne po bëjmë opozitë të vërtetë. PD në vend që të denoncojë bashkë me ne, për tarifën e rrugës Thumanë-Kashar, nxjerr Flamur Nokën që të më sulmojë mua. I ftoj qytetarët që të hapin sytë dhe të shikojnë realitetin”, u shpreh ai.
