Partia Socialiste përjashton Armando Prengën
Partia Socialiste ka përjashtuar nga grupi i saj parlamentar deputetin Armando Prenga.
Deputeta socialiste, Olta Xhaçka deklaroi nga selia rozë se Partia Socialiste dënon sjelljet e turpshme në Laç. Xhaçka theksoi se “PS e dënon me ashpërsinë më të madhe përfshirjen e Armando Prengës në këtë ngjarje”.
“Po ashtu për çdo anëtar të partisë sonë është e qartë se Partia Socialiste nuk është strehë ku mund të gjejë mbrojtje nga agjencitë ligjzbatuese cilido që shkel ligjin. Kjo është jo vetëm e qartë edhe për çdo deputet, po çdo deputet ka detyrë parësore ta mbrojë dhe promovojë me fjalë, sjellje dhe veprime, faktin se kultura e pandëshkueshmërisë që Sali Berisha ngriti në sistem për familjen dhe klanin e tij politik, ka vdekur bashkë me pushtetin e tij vrastar e të korruptuar”, tha Xhaçka.
Duke folur për vendimin e përjashtimit të Prengës, Xhaçka në emër të PS-së tha se “Armando Prenga ka humbur çdo të drejtë morale të jetë pjesë e Partisë Socialiste”.
