Partia e Lirisë ka reaguar ashpër pas vendosjes së taksës progresive 23% për të ardhurat mbi 14 milionë lekë në vit, duke e cilësuar këtë masë si një akt politikisht të papranueshëm dhe institucionalisht të dënueshëm.
Në një deklaratë për mediat, zëdhënësja e Presidentit të Partisë së Lirisë, Jasmira Memelli, tha se qeveria e ka mbajtur të fshehtë këtë politikë fiskale gjatë fushatës së 11 majit, duke mashtruar votuesit dhe duke cenuar besimin mes qytetarit dhe shtetit.
“Vendosja e taksës progresive 23% për të ardhurat mbi 14 milionë lekë vjetore për individë, menjëherë pas përfundimit të zgjedhjeve të 11 majit, përbën një akt të rëndë politikisht dhe institucionalisht të dënueshëm. Kjo masë nuk është thjesht një ndryshim fiscal, ajo është dëshmi e një qasjeje të rrezikshme ndaj qeverisjes, mungesë transparence, manipulim të opinionit publik dhe përdorim i sistemit tatimor për qëllime afatshkurtra politike.
Fakti që kjo taksë nuk u bë publike gjatë fushatës elektorale tregon qartë se qeveria e ka fshehur qëllimisht këtë politikë për të mos rrezikuar rezultatin elektoral. Ky është një mashtrim i drejtpërdrejtë ndaj votuesve, që rrënon parimin themelor të besimit ndërmjet qytetarit dhe shtetit. Është e papranueshme që pas sigurimit të votës, qeveria të ndryshojë rregullat e lojës ekonomike, duke goditur shtresat që mbajnë mbi supe barrën më të madhe të prodhimit dhe zhvillimit në vend”, tha ajo.
Sipas saj, rikthimi i kësaj takse, e rrëzuar më parë nga Gjykata Kushtetuese, përbën një përçmim të ndarjes së pushteteve dhe një goditje të padrejtë për shtresat që kontribuojnë ndershmërisht në ekonomi.
Memelli i bën thirrje institucioneve të drejtësisë dhe shoqërisë që të reagojnë ndaj këtij precedenti të rrezikshëm dhe kërkon anulimin e menjëhershëm të taksës, duke kërkuar një reformë të re fiskale të drejtë dhe transparente.
“Më tej, ky vendim përbën edhe një përbuzje ndaj rendit kushtetues, duke qenë se forma e mëparshme e kësaj takse është rrëzuar nga Gjykata Kushtetuese. Rikthimi i saj përmes një akti të njëanshëm, pa një proces të hapur konsultimi, ngre shqetësime serioze për respektimin e ndarjes së pushteteve dhe autonominë e institucioneve të pavarura. Në vend që të luftojë evazionin fiskal dhe të vendosë drejtësi në shpërndarjen e barrës tatimore, qeveria ka zgjedhur të rëndojë më tej mbi ata që deklarojnë ndershmërisht të ardhurat e tyre,sic janë profesionistët, sipërmarrësit, punonjësit me të ardhura të larta, por të justifikuara dhe të tatueshme.
U bëjmë thirrje institucioneve të drejtësisë, organeve të mbikëqyrjes kushtetuese dhe gjithë shoqërisë shqiptare që të reagojnë ndaj këtij precedenti të rrezikshëm. Ekonomia shqiptare nuk mund të ndërtohet mbi vendime të fshehta, të njëanshme dhe të diktuara nga agjenda politike afatshkurtra. Kërkojmë anulimin e menjëhershëm të kësaj takse të padrejtë dhe nisjen e një dialogu të vërtetë publik mbi një reformë tatimore të drejtë, transparente dhe që respekton standardet kushtetuese dhe ekonomike të një shteti demokratik”, tha ajo.
