Drejtoria e Auditimit të Brendshëm në Ministrinë e Financave ka faktuar parregullsi në zhdoganimin e mallrave, në rastet kur është pranuar vlera sipas transaksionit disa herë më e ulët se çmimi, duke përdorur për disa artikuj të dhëna të procesverbaleve të vlerës të para mbi 10 viteve. Njoftimi zyrtar është bërë në raportin e auditimit të brendshëm për përdorimin e burimeve publike, shkruan Gazeta Shqiptare.
Zbulimet për mospërputhje të Kodit Tarifor me Kodin e Emërtesës janë të ardhura të munguara, kryesisht nga TVSH.
“Ka pasur shkelje të procedurave të zgjedhjes për kontroll, zgjatje të pajustifikuara në kryerjen dhe raportimin e kontrolleve tatimore dhe kontrolle në proces për rreth një vit, propozime mbi dy herë për rikontroll për të njëjtët tatimpagues, rikontrolle të rekomanduara nga auditimi i brendshëm dhe të pakryera, kontrolle tatimore arbitrare në DRT Vlorë të periudhës 2012-2013”, thuhet në njoftim.
Ndërkohë, në Drejtorinë e Përgjithshme të Tatimeve dhe Doganave janë vërejtur shkelje të rregullave të prokurimit publik, për të cilat janë dënuar me gjobë nga 50 mijë deri në 300 mijë lekë 8 zyrtarë, ndërsa janë dhënë masa disiplinore për 4 të tjerë. Sipas ministrisë, bazuar në raportet e auditimeve të kryera, për titullarët e institucioneve janë dhënë masa disiplinore të të gjitha niveleve, për më shumë se 100 punonjës, gjoba për shkeljet në 9 raste, si dhe kallëzim penal për zyrtarët publikë në dy raste. Nga auditi rezulton se mungon baza e të dhënave, regjistrimi i borxhit mbi kreditë e këqija në vite në Agjencinë e Trajtimit të Kredive, duke e bërë pothuajse të pamundur mbledhjen e tyre deri në vitin 2013. Po në këtë institucion, për pagesë të vendimeve gjyqësore për largime të padrejta nga puna të punonjësve deri në vitin 2013 i është shkaktuar buxhetit të ATK-së një dëm prej 14.9 milionë lekësh.
