Ministri Beqaj i është drejtuar foltores së parlamentit për të reaguar në lidhje me akuzat sapo lëshuara nga deputetja demokrate, në lidhje me shkarkimin e Çlirim Hajdarmatajt, kreut të degës së Fondit të Sigurimeve të Kujdesit Shëndetësor në Tropojë.
Por diçka e tillë nuk ka ndodhur pasi grupi i deputetëve të PD është çuar në këmbë dhe i është turrur foltores së kuvendit, duke bllokuar Ministrin. Madje në një akt të paprecedentë, kreu i grupit parlamentart të PD Paloka ka shtyrë Ministrin Beqaj.
Zv kryetarja e Parlamentit Valentina Leskaj ka ndaluar punimet e kuvendit pas sjelljes së opozitës.
BEQAJ: BISEDA ËSHTË BËRË NË KORRIK, NË INCIZIM ËSHTË PRERË NJË PJESË
Pas qetësimit të situatës ka folur Ministri Beqaj, duke replikuar ndaj akuzave të Albana Vokshit për cilësinë e spitalit onkologjik dhe një bari të listës së ilaceve të rimbursueshme.
“Janë barna të ndryshëm, por i sjell një importues në Shqipëri, cfrë lidhjesh keni ju me atë, gjejini ju… unë po e përsërish, do të vijoj të shkallmoj monopolet e barnave që keni vendosur ju. Cfarë skëterre gjetëm në shërbimin e spitalit të onkologjisë dhe si është sot! Nata me ditën.”- tha Beqaj.
Më pas Beqaj i është referuar regjistrimit të djeshëm të publikuar në media, duke thënë se biseda në fjalë është bërë më datën 8 korrik të këtij viti. Ministri ka shtuar më pas se në regjistrimin e bisedës diçka është hequr nga inçizimi.
“Ajo bisedë është bërë në 8korrik… kontrolloni në “1 min e 46 sekonda” cfarë fjalësh keni hequr. Pse do prisja 4 muaj për hakmarrje?! Por besoj se kam dakortësinë tuaj, që nëse një drejtues paguan vartësin e tij për 3 muaj kur ai është në Francë, pa dyshim që kjo nuk mund të pranohet… kjo është biseda e 3 korrikut!”- tha Beqaj.
VOKSHI: PËR BEQAJN DUHET NJË MORATORIUM, LARGOHU SA MË PARË
Deputetja demokrate Albana Vokshi ka kërkuar largimin nga detyra të Ministrit Beqaj, duke thënë se ai ka pranuar publikisht abuzimin e tij.
“I vetmi ministër që ka pranuar publikisht abuzimin e tij me zë dhe figurë, të largohet një herë e më parë. Babëzia për para i ka errësuar sytë dhe nuk sheh më se çfarë bën.
A e dini ju që është viti i parë që lista e barnave të rimbursueshme në vitin 2016 është publikuar në qershor, sepse Beqaj nuk po ndante dot tortën e përfitimeve. Pasi e mbajti në zyrë listën për shumë javë dhe e dnryshoi, në listën e barnave të rimbursueshme të 2016, ai ka ndryshuar ketosterilin me një bar tjetër… për të hoqi dhe një drejtor sepse ai nuk e pranonte këtë ndryshim.”- tha Vokshi.
