Ish-kryeministri Sali Berisha ka propozuar nga foltorja e Kuvendit ngritjen e një grupi pune për të hartuar një Rezolutë nëpërmjet së cilës t’i hiqen dekoratat torturuesve të periudhës komuniste.
Berisha kërkoi të mos humbet kohë, por të gnrihet menjëherë ky grup pune.
“Është në nderin e Parlamentit të miratojë një rezolutë, ku të imponojë për ekzekutivin tërheqjen e menjëhershme të dekoratave për gjakësorët, për xhelatët e kalvarit komunist. Ndaj dhe mendoj të krijohet një grup, të hartojmë rezolutën për heqjen e menjëhershme të dekoratave për ata që kanë bërë krime kundër njerëzimit”, tha Berisha.
Ndërkohë ish-kryetarja e parlamentit Jozefina Topalli, tha se nuk mund të vijohet seanca pa gjetur një zgjidhje për të hequr dekoratat.
“Zoti kryetar i Kuvendit unë mendoj se nuk mund të ecim në këtë seancë sikur nuk ka ndodhur asgjë. Të marrim vesh për dekorata me mirënjohje për veprimtarinë e tyre është e tepërt, ndaj unë kërkoj që të tërhiqen mbrapsh dekoratat për persekutorët”, tha Topalli.
Ndërkohë, kryetari i grupit të deputetëve demokrat Edi Paloka, kërkoi 5 minuta pushim, pasi deputetët e opozitës do të zhvillojnë një mbledhje për diskutimin e kësaj çështjeje midis tyre.
