Veçse në një rrëfim personal për familjen e saj, Linda Rama ka folur në Tv Klan edhe për mënyrën si i sheh ajo disa aspekte të shoqërisë duke dhënë disa mesazhe të orientuara drejt vlerave.
E pyetur nga fëmijët e emisionit “Në Kurthin e Piter Pan” se kush e kishte rrogën më të lartë, ajo apo bashkëshorti, Linda u përgjigj:
“Nuk ka rëndësi se kush e ka rrogën më të madhe por se si kontribuojmë të gjithë në familje, sa e duam njëri tjetrin dhe a e bëjmë punën me pasion apo jo”, tha ajo.
Linda thekson se është e rëndësishme që çdo njeri, “të bëjë më të mirën në çdo ditë të jetës. Të jetë i përmbushur për veten dhe të lërë një kujtim te të tjerët”. Këshillë kjo që ua jep edhe fëmijëve të vetë, Reas e Gregut.
Linda u pyet edhe për raportin me internetin dhe teknologjinë, që sipas saj, duhet përdorur në mënyrë të zgjuar, pa lejuar që teknologjia të vendosë hije mbi dijen njerëzore.
“Nuk besoj që nuk ka një prind që nuk e ndjen peshën e frikës se çfarë ndodh pas atij ekrani çdo ditë në duart e fëmijëve dhe të rinjve veçanërisht. Duhet të shkojmë tek gjithë ky diskutim në kushtet kur ne duhet ta pranojmë dhe të fillojmë të mendojmë për të parë se si interneti mund të përdoret dhe të kthehet në përfitimin tone. Kemi nevojë të dimë se si do ta përdorim internetin, kush janë platformat që nuk shkaktojnë rrezik për fëmijët dhe prindërit këto nuk kanë se si t’i dinë. Duhet të ketë hapësira televizive. Veçanërisht radiotelevizioni publik shqiptar duhet të krijojë hapësirën e këshillimit për prindërit dhe për të rinjtë, për të parandaluar ato fenomene që ne i kemi frikë brenda vetes sonë dhe për më tepër ne duhet të përpiqemi shumë të gjithë që mos ta lejojmë ekranin që të na vërë hije mbi dijen dhe shpirtin njerëzor. Këto të dyja duhet ta sfidojnë atraksionin e kotë dhe garën për vëmendje të internetit“, tha ajo.
Për Lindën, bashkëjetesa fetare është një nga vlerat më të mëdha shqiptare.
“Unë mendoj se bashkëjetesa jonë fetare është diamanti i kombit në zemër të Evropës. Në qoftë se në ngjarjet që ndodhën në Francë simbolika e bashkëjetesës bëri spektaklin e jashtëzakonshëm në mes të Parisit dhe u duartrokit, e bëri se ishte e vërtetë. Unë mendoj se është një nga vlerat e mëdha të kombit që e ka dhe duhet ta kultivojë bashkëjetesën fetare, veçanërisht në ditët që jemi dhe mendoj se xhamia është një institusion i merituar i popullsisë që praktikon dhe beson. Ashtu siç është një institucion i merituar Kisha Katolike, Kisha Ortodokse brenda lirisë së individit për të besuar”.
