Qarkullimi i masave ajrore të ftohta dhe të thata nga verilindja e kontinentit do të bëjë që moti i kthjellet por i ftohtë të dominojë në pjesën më të madhe të vendit tonë. Përjashtim bëjnë zonat verilindore dhe juglindore të cilat do të dominohen nga reshje të pakta dëbore.
Pjesa e dytë e ditës do të sjellë largim të reshjeve të dëborës nga zonat malore duke bërë kështu që i gjithë vendi të dominohet nga moti i kthjellët, por i ftohtë. Këto kushte të motit do të mbeten edhe gjatë natës.
Sipas MeteoAlb, temperaturat e ajrit do të pësojnë rënie të ndjeshme në të dy vlerat ekstremale të ditës duke bërë që në zonat malore termometri të ulet deri në -8 gradë Celcius. Era do të fryjë e lehtë, me shpejtësi maksimale deri 20 km/h nga drejtimi verilindor duke gjeneruar në det, dallgëzim te ulët. 
Europa
Europa Lindore dhe vendet Nordike do të dominohen nga vranësira dhe reshje të dendura dëbore ku problematike situata do të paraqitet në Balltik pasi reshjet do të jenë në sasi të konsiderueshme. Po ashtu, Turqia do të përfshihet nga vranësira dhe shira të rrëmbyeshëm.
Ndërsa Europa Qendrore, Jugperëndimore si edhe vendet e Mesdheut do të dominohen nga moti i kthjellët por i ftohtë./noa/a.k
