Prej disa ditësh, në mediat italiane ka filluar të përflitet për një interesim të Sampdorias për sulmuesin e përfaqësueses shqiptare, Armando Sadikun.
Sipas “Calciomercato.com”, burime pranë klubit e kanë konfirmuar një interes të tillë për sulmuesin kuqezi që shënoi golin e fitores historike kundër Rumanisë dhe që me shumë mundësi do të largohet nga Zurichu i rënë në kategorinë e dytë në Zvicër.
Megjithatë, grupi i menaxhimit të lojtarit, “Fairplay Agency”, ka preferuar që të mos japë emrin e klubit që interesohet për futbollistin shqiptar.
Përfaqësues të kësaj kompanie menaxhimi thjesht kanë bërë të ditur për portalin italian se kanë vendosur kontakte më “një klub të Serisë A”, duke filluar diskutimet konkrete për transferimin e Sadikut në Itali./a.m.
