Qeveria komuniste ftonte delegacione shqiptarësh nga diaspora, Kosova, Mali i Zi e Maqedonia në rastet e festave kombëtare e megjithatë i përgjonte rreptësisht nga afër. Gazeta Shqiptare ka botuar sot një speciale lidhur me praktikat e Sigurimit të Shtetit në lidhje me këto raste. Edhe pse delegacionet e vëllezërve shqiptarë vinin plot bujë, ata nuk mbeteshin jashtë vëzhgimit të syrit të Sigurimit.
Secilit i studiohej biografia deri në detaje, nga Drejtoria I e Ministrisë së Punëve të Brendshme.
Rasti më konkret i të gjitha këtyre procedurave të vëzhgimit dhe survejimit nga ana e Sigurimit të Shtetit ndaj pjesëtarëve të një delegacioni patriotësh të shqiptarëve të Kosovës është ai i 29 Nëntorit të vitit 1969, me rastin e 25-vjetorit të Çlirimit, ndaj delegacionit të kryesuar nga Rexhep Duraku, babai i Heroit të Popullit Emin Duraku.
Në relacionin sekret të zv/ministrit të Brendshëm, Rexhep Kolli, paraqiten me imtësi biografitë e të gjithë pjesëtarëve të delegacionit të patriotëve shqiptarë të Kosovës dhe veçanërisht të të gjithë familjes Duraku, e cila, edhe pse mbante mbiemrin e një prej heronjve kryesorë të Luftës Antifashiste Nacionalçlirimtare, Emin Duraku, do të vëzhgohej dhe përpunohej biografikisht.
Vetë Ramiz Alia, Sekretar i Komitetit Qendror të PPSH, do të vihej në dijeni rreth kësaj vizite të delegacionit të patriotëve kosovarë, pikërisht nga ky dokument sekret i Drejtorisë I të MPB-së, në të cilin disa nga pjesëtarët e këtij delegacioni do të cilësoheshin me të kaluar të paqartë dhe, për më tepër, një prej tyre, Ali Curri (kushëri i largët i Bajram Currit), dyshohej se ishte agjent i UDB-së, dhe se kishte ardhur “vetvetiu dhe i paftuar” në këtë delegacion. Këto procedura të survejimeve dhe përpunimeve agjenturore ndaj pjesëtarëve të delegacioneve të ndryshme dhe veçanërisht atyre të shqiptarëve të Kosovës e diasporës, nga ana e MPB-së dhe Sigurimit të Shtetit asokohe do të ishin shumë të shpeshta dhe tejet “normale”, duke marrë parasysh natyrën tejet mosbesuese dhe agresive të regjimit komunist të Enver Hoxhës ndaj grupeve të ndryshme, duke i cilësuar shpeshherë ata si agjentë të shërbimeve të huaja.
Gazeta Shqiptare
