Një sherr në familje mes babait dhe të birit, për pak sa nuk ka përfunduar në vrasje. Shtetasi me iniciale P.G., banues në fshatin Ferr-Shkopet në Kurbin, pas një konflikti me të birin, ka qëlluar me armë zjarri drejt këtij të fundit.
Fatmirësisht, si pasojë e të shtënave, nuk është lënduar njeri. Menjëherë pas ngjarjes, babai është larguar nga banesa.
Policia u vu në ndjekje të tij, ku pas disa orësh kërkime, është bërë i mundur arrestimi i shtetasit P.G.
Njoftimi i policisë:
Kurbin/ Parandalohet një ngjarje e mundshme kriminale në familje.
Kapet dhe vihet në pranga një shtetas që qëlloi me armë zjarri në drejtim të djalit të tij, pa i shkaktuar lëndime.
Sekuestrohet arma e zjarrit tip pistoletë me municion luftarak, të cilën e mbante pa leje në banesë.
Shërbimet e Policisë, pas marrjes së njoftimit së në fshatin Ferr-Shkopet, Kurbin, kishte një konflikt në familje dhe se babai kishte qëlluar me armë në drejtim të djalit, kanë shkuar menjëherë në adresën e dhënë.
Falë veprimeve shpejta hetimore, pas disa orësh ndjekjeje u bë e mundur kapja dhe arrestimi i autorit të dyshuar, shtetasit P. G., banues në Ferr-Shkopet, Kurbin, duke parandaluar përshkallëzimin e mëtejshëm të konfliktit.
Ky shtetas, pas një konflikti të çastit, ka qëlluar me një armë zjarri në drejtim të djalit të tij, shtetasit L. G., banues në Ferr-Shkopet, Kurbin, pa i shkaktuar lëndime.
Materialet hetimore i kaluan Prokurorisë së Rrethit Gjyqësor Kurbin, për veprime të mëtejshme.
g.kosovari
