“Është e pamundur për mua të harroj Nënë Terezën, së shpejti ajo do të jetë Shën Tereza e Kalkutës”, thote Gautam Lewis. Ky është një nga dëshmitarët e mrekullive të Nënë Terezës, sjellë sot nga CNN.
Gautam, një pilot që jeton në Londër, lindur në Kalkuta, Indi, në vitin 1977 u braktis nga prindërit për shkak të një sëmundjeje të rëndë dhe varfërisë.
Ai tregon se si ajo i dha një shans për t’i shpëtuar varfërisë dhe i ndryshoi jetën, duke e çuar të jetonte në Angli.
“Une kam pasur poliomelit dhe isha i paralizuar, familja ime nuk ishte në gjendje të kujdesej për mua si duhej”, tregon Lewis.
Ai thotë se edhe tani ka lëvizshmëri të kufizuar të gjymtyrëve “por e konsideroj veten time me fat sepse i kam mbijetuar një virusi nga i cili shumë kanë vdekur”, shprehet ai.
“Edhe pse fillimi i historisë time nuk shihet si i lumtur, unë e konsideroj veten time me fat, sepse Nënë Tereza më mori nën kujdesin e saj”.
Ata kanë ndenjur bashku në shtëpinë e fëmijëve në kujdesin e “Misionareve të Bamirësisë”.
“Unë nuk e shihja çdo ditë, sepse kishte shumë punë për të bërë në orarin e saj të përditshëm por prapë se prapë ajo gjithmonë gjente kohën për të na kontrolluar ne, fëmijët e saj”, thotë ai. “Çdo të diel, ajo vinte për të na veshur rrobat më të mira, dhe na sillte kapele të reja”.
“Unë nuk mund të ecja në atë kohë dhe zvarritesha kudo në dysheme, por Nënë Tereza edhe pse shumë e gjatë, përkulej, më merrte dhe më shëtiste”, thotë, duke shtuar: “Ajo ishte ‘hija ime e gjatë’ që mbante gjithmonë sytë e saj të kujdesshëm mbi mua”.
Panorama/d.i.
