Rusia mund të ndërmarrë një sulm të kufizuar ndaj territorit të NATO-s në çdo moment, ka paralajmëruar një zyrtar i lartë ushtarak gjerman.
Gjenerallejtënant Aleksander Sollfrank, i cili drejton komandën e operacioneve të përbashkëta të Gjermanisë dhe mbikëqyr planifikimin e mbrojtjes tha këtë të premte: “Nëse shikoni aftësitë dhe fuqinë luftarake aktuale të Rusisë, ajo mund të nisë një sulm në shkallë të vogël kundër territorit të NATO-s që nesër”.
“Sulm i vogël, i shpejtë, i kufizuar rajonalisht – asgjë e madhe – sepse Rusia është shumë e angazhuar në Ukrainë për një gjë të tillë të madhe”, shtoi ai më tej.
Sollfrank përsëriti paralajmërimet e NATO-s se Rusia mund të jetë në gjendje të kryejë një sulm në shkallë të gjerë ndaj aleancës me 32 anëtarë që nga viti 2029.
Por, Vladimir Putin mohon se ka plane të tilla, duke këmbëngulur se pushtimi i plotë i Ukrainës nga Moska ishte në mbrojtje kundër zgjerimit të NATO-s.
Pavarësisht pengesave në luftën në Ukrainë, Sollfrank tha se forcat ajrore ruse mbeten të fuqishme dhe se forcat bërthamore dhe raketore nuk janë prekur.
“Ndërsa Flota e Detit të Zi ka pësuar humbje të mëdha, flotat e tjera ruse nuk janë zvogëluar. Forcat tokësore po pësojnë humbje, por Rusia thotë se synon të rrisë numrin total të trupave në 1.5 milionë ushtarë. Dhe Rusia ka mjaftueshëm tanke kryesore luftarake për ta bërë një sulm të kufizuar të mundshëm që nesër”, tha ai.
Por ekzistojnë tre faktorë që do të përcaktojnë nëse Rusia do të vendosë të sulmojë apo jo sipas Sollfrank. E para është fuqia ushtarake e Rusisë, përvoja e saj luftarake dhe udhëheqja e saj.
“Këta tre faktorë më çojnë në përfundimin se një sulm rus është brenda fushës së mundshme. Nëse do të ndodhë apo jo, varet në masë të madhe nga sjellja jonë”, tha ai.
