Ministri i Brendshëm Fatmir Xhafaj dhe drejtori i Policisë së Shtetit Ardi Veliu kanë zhvilluar sot një vizitë blic në Portin e Durrësit. Në një prononcim të shkurtër për gazetarët ministri Xhafaj dha mesazhin e intensifikimit dhe bashkëpunimit më të ngushtë midis policisë, prokurorisë dhe SHISH për arrestimin e grupeve kriminale që operojnë në Durrës.
Xhafaj tha se ka grupe kriminale që operojnë në këtë qark dhe shumë shpejt do të shihen rezultate për arrestimin e tyre. Një vëmendje e veçantë-theksoi Xhafaj- po i kushtohet kufirit, për bllokimin e trafikut të lëndëve narkotike drejt Italisë.
Ai tha se po punohet ngushtësisht midis prokurorisë dhe SHISH në këtë drejtim, pavarësisht se trafikantët po kërkojnë rrugë të reja për trafikun e drogës.
Pyetjes së gazetares Klodiana Haxhiaj lidhur me numrin e grupeve kriminale që operojnë në Durrës, Xhafaj tha se nuk mund të tregojë numrin, por rezultatin do e tregoje shumë shpejt. Ndërkohë, në lidhje me ankesat që kanë bizneset në Durrës me radhë të gjatë të kamionëve Xhafaj tha se bllokimi i lëndëve narkotike ka bërë që të ushtrohen kontrolle të imtësishme, ndaj kërkoi mirëkuptimin e qytetarëve. (Balkanweb)
