“Do të krijojmë një bazë të dhënash kombëtare ku do të regjistrohen të gjitha portalet online që operojnë në Shqipëri, duke shmangur maksimalisht historitë e fantazmave që operojnë në Shqipëri”. Kështu theksoi Kryeministri Edi Rama në fjalën e tij gjatë pritjes së mirëseardhjes për delegacionet e agjencive të lajmeve nga rajoni dhe Europa, të cilat do të marrin pjesë në konferencën ndërkombëtare me titull “Agjencitë e lajmeve vs ‘Fake News’”, të organizuar në Tiranë nga Agjencia Telegrafike Shqiptare.
Duke folur para përfaqësuesve të agjencive të lajmeve nga rajoni dhe Europa, Kryeministri Rama pohoi se në Shqipëri ka një legjislacion nga më të relaksuarit në lidhje me penalitetet për shpifjen dhe lajmet e rreme. Por, tha ai, “do rrisim gjobat për lajmet e rremë dhe kjo është mëse e mjaftueshme për të krijuar një situatë më të favorshme”.
“Do të garantojmë të drejtën e autorit, që mediet të jenë të mbrojtura nga ligji që të mos e shohin veten të kërcënuara sekondën e parë që nxjerrin një prodhim të tyre dhe që merret e shumëfishohet në pafundësi”, – vuri në dukje Kryeministri Rama.
Ai theksoi se nuk mjafton vetëm të ndëshkohen autorët e shpifjes.
“Nëse një media është përgjegjëse për një shpifje, edhe çdo njeri apo media tjetër që e përhap dhe e publikon është po aq përgjegjës”, – shtoi Rama.
/b.d
