Hulumtimi i ri i klinikës Mayo ka zbuluar që paraja është nxitje efikase për dobësim dhe që të testuarit të cilët janë të shpërblyer financiarisht më shumë këmbëngulin në humbjen e peshës dhe humbin më shumë kilogramë se ata që nuk fitojnë asnjë shpërblim, transmeton koha.net.
Qindra të punësuar të shëndetshëm të klinikës Mayo ose anëtarë të familjeve të tyre janë ndarë në një nga katër grupet, ku në dy grupe janë ndarë shpërblime me para, ndërsa në dy jo. Të gjithë pjesëmarrësit kanë qenë në moshën prej 18 deri 63 vjeç dhe kanë pasur indeksin e masës trupore në mes 30 dhe 39 kg/m2 (sipas Qendrave amerikane për kontroll dhe preventivë të sëmundjes njerëzit me indeks të masës trupore më të madh se 30 konsiderohen të trashë).
Qëllimi i çdo të testuari ka qenë që çdo muaj të dobësohen rreth 2 kilogramë, dhe kështu të arrijnë peshën e dëshiruar të caktuar më herët. Pjesëmarrësit janë matur një herë në muaj përgjatë 12 muajve, për dallim nga hulumtimet e mëhershme të cilat po ashtu kanë përfshirë nxitjet financiare, por të testuarit i kanë përcjellë në periudhën prej 12 ose 36 javësh.
Pjesëmarrësit e hulumtimit të cilët me sukses kanë arritur qëllimin kanë fituar nga 30 dollarë në muaj, ndërsa ata që nuk kanë pasur sukses është dashur të japin 20 dollarë në llogarinë e përbashkët. Të gjithë pjesëmarrësit e grupit në të cilin suksesi është shpërblyer me para në fund të hulumtimit kanë marrë pjesë në tërheqjen shpërblyese në të cilën kanë mundur të fitojnë shuma nga fondi i përbashkët.
Në grupin e të testuarve që janë shpërblyer 62 për qind kanë arritur qëllimin me sukses dhe mesatarisht kanë humbur rreth 4 kilogramë, derisa në grupin e dytë vetëm 26 për qind të tyre kanë arritur peshën e dëshiruar, me humbjen mesatare prej 1 kilogrami. “Mesazhi i hulumtimit tonë është që nxitjet financiare mund të ndihmojnë në dobësim, përmirësojmë rezultatet dhe të rrisin forcën e vullnetit”, ka deklaruar dr. Driver.
Hulumtimi ka zbuluar që edhe te testuarit nga grupi i shpërblyer të cilët për shkak të mossuksesit kanë paguar para në fondin e përbashkët, kanë qenë më të prirë të marrin pjesë në program për dallim nga ata që kanë qenë në grupin pa shpërblime dhe dënime. (b.an)
