Nga Artur Ajazi
Prej 15 vitesh, një pallat 12 katësh në lagjen “Partizani” rruga Pellumb Isai” në Elbasan, është kthyer në “mollë sherri” dhe debatesh mes banorëve dhe pronarit L.P. i cili ka ikur dhe e ka braktisur objektin. Ai pallat ka nisur nga ndertimi prej 15 vitesh, madje banorët thonë se “ai ndertues ka shitur hyrjet edhe nga 2 herë, dhe ka futur gjithë dynjanë në sherr”. Banori i rrugicës ku gjendet pallati i braktisur Kujtim Lufta shprehet se “mirë që nuk po e mbaron pallatin, i cili po degradon, mirë që po mashtron shtetin dhe ne, por ka vite që ambientet e pallatit janë kthyer në vend për drogaxhinjtë, po zihemi çdo natë me përdoruesit e drogave, njoftojmë policinë, ajo ose nuk vjen , ose na thotë “kapeni ndonjë drogaxhi dhe mbajeni derisa të vijmë ne”. Fajtori në rastin konkret mbetet ndërtuesi, që e ngriti si karabina pallatin, dhe tani e ka braktisur. Ku është shteti, ku janë Tatim-Taksat, ku është prokuroria dhe gjykata, që në 15 vjet kanë marrë me qindra denoncime, dhe heshtin ? Si ka mundësi që një ndertues, hap themelet e një pallati, mbledh para nga blerësit dhe arrin të ndertojë si karabina gjithë atë objekt, dhe të mbetet larg syrit të Degës së Tatim-Taksave Elbasan, duke kaluar çdo afat kohor ? Si ka mundësi që Policia Vendore Elbasan të heshtë, të mos marrë në konsideratë njoftimet dhe denoncimet e banorëve të lagjes “Partizani” Elbasan, mbi problemet e përditshme që u hapin atyre drogaxhinjtë që hyjnë çdo natë në pallatin e braktisur ? Banorët e rrugicës ku ndodhet pallati i braktisur nga ndërtuesi L.P, shprehen se “ne do të marrim masa të tjera më rradikale vetë, në rast se nuk nderhyn policia dhe prokuroria, pasi po degradon tarraca e pallatit, dhe po bie mbi banesat tona përdhese pjesë betoni dhe dërrasa , që janë ngjitur me pallatin”. Ata i bëjnë thirrje organeve policore dhe hetimore, të marrin urgjentisht masa, pasi mund të ndodhin ngjarje të rënda. Debatet dhe agravimi i tyre me drogaxhinjtë, ka arritur deri atje sa të ndodhin edhe përplasje fizike mes banorëve dhe personave që vijnë dhe drogohen në ambientet e braktisura të pallatit që po rrënohet çdo ditë. Ata i bëjnë thirrje organeve hetimore të shqyrtojnë denoncimet e banorëve, pasi situata në atë pallat të braktisur, mund të sjellë një ditë të bukur edhe viktima. Ky nuk është rasti i vetëm në Elbasan dhe jo vetëm, kur pallatet ngrihen si karabina dhe pastaj ndertuesit pasi marrin paratë nga blerësit qysh në themel, ja mbathin, duke lënë në mëshirën e fatit qytetarët. Policia dhe Prokuroria e Elbasanit, nuk duhet të heshtin dhe të bëjnë “sehirxhiun” por ti marrin seriozisht denoncimet e qytetareve, përpara se të kemi ngjarje të rënda.
