Përdorimi i kremrave mbrojtës nga dielli mund të krijojë një ndjenjë të rreme sigurie, duke bërë që njerëzit të ekspozohen më gjatë dhe në mënyrë më të rrezikshme ndaj rrezeve të diellit. Për këtë arsye, dermatologët rekomandojnë që mbrojtja nga dielli të mos kufizohet vetëm te kremi, por të përfshijë edhe veshjen e përshtatshme, zgjedhjen e orareve të ekspozimit, si dhe faktorë individualë si mosha dhe ndjeshmëria e lëkurës.
Ky është përfundimi i një studimi amerikan, i cili analizoi të dhënat nga dy baza të mëdha të dhënash – njëra me pjesëmarrës nga Kanadaja dhe tjetra nga Britania e Madhe.
Sipas ekspertëve, kjo nuk do të thotë se kremi shkakton kancer, por se ai mund t’i bëjë njerëzit të ndihen të mbrojtur dhe të qëndrojnë më gjatë në diell.
Ndjenja e rreme e sigurisë
“Mes specialistëve ky fenomen njihet si ‘paradoksi i rrezikshëm i kremit mbrojtës’. Filtrat mbrojtës krijojnë një ndjenjë të rreme sigurie, duke i shtyrë njerëzit të ekspozohen ndaj diellit në mënyrë më të guximshme”, shpjegon Paolo Ascierto, drejtor i Njësisë së Onkologjisë së Melanomës në Institutin e Tumoreve Pascale në Napoli.
Sipas tij, kremi kundër diellit është thelbësor, por nuk është një “leje” për të qëndruar me orë të tëra nën rrezet e forta të diellit. Për më tepër, shumica e njerëzve nuk aplikojnë sasinë e duhur të kremit ose nuk e riaplikojnë atë pas disa orësh, siç rekomandohet.
Ascierto këshillon përdorimin e rrobave mbrojtëse, sidomos për personat që digjen lehtë nga dielli. Këmishët me mëngë të gjata prej liri ose pambuku të hollë dhe pantallonat e gjata janë zgjedhje të mira për qëndrime të gjata jashtë.
Ai shton se ngjyrat e errëta, si e zeza, bluja apo e kuqja, ofrojnë mbrojtje më të mirë nga rrezet e forta. Gjithashtu rekomandohen syze me filtra të certifikuar dhe kapelë me strehë të gjerë, e cila mbron veshët, skalpin dhe qafën.
Mbrojtje e personalizuar nga dielli
Një tjetër koncept që po fiton terren mes dermatologëve është mbrojtja e personalizuar, e cila përshtatet sipas karakteristikave të çdo individi.
Sipas Piergiorgio Malagoli, përgjegjës i Dermatologjisë në Policlinikun San Donato në Milano, disa kategori njerëzish kanë rrezik më të lartë për djegie nga dielli. Mes tyre janë fëmijët, personat që marrin barna fotosensibilizuese, ata që vuajnë nga sëmundje si lupusi, artriti reumatoid apo sëmundja e Crohn-it, si dhe njerëzit që punojnë për shumë orë në ambiente të hapura.
Ekspertët paralajmërojnë se rrezet ultravjollcë mund të dëmtojnë lëkurën nga mesi i marsit deri në mesin e tetorit, edhe kur qielli është me re ose temperaturat nuk janë të larta.
Po ashtu, shumë njerëz nënvlerësojnë rrezikun e ekspozimit të shkurtër, por intensiv ndaj diellit gjatë fundjavave ose pushimeve në vende tropikale jashtë sezonit, kur lëkura nuk është ende e përshtatur me rrezatimin diellor.
