Ceremonia e inaugurimit të presidentit të ri shqiptar Ilir Meta po fillon me paradokse të mëdha protokollare. Ato janë sa qesharake, por edhe treguese për formën dhe vetë politikën shqiptare. Presidenti i ri i vendit nuk do ketë në krah gjatë ceremonisë bashkëshorten e tij Monika Kryemadhi.
Është një rast i rrallë dhe i paprecedentë, kur bashkëshortja jeton dhe nuk është në krah të presidentit në presidencën shqiptare. Arsyeja është e ditur. Pak kohë më parë, znj. Monika Kryemadhi ka marrë detyrën e drejtimit të LSI-së formacionit politik, që më parë e drejtoi bashkëshorti i saj! Në një rrjedhë normale politike, kjo mund të ishte shmangur nga partia e tyre, pa krijuar paragjykimet që do të krijojë me patjetër më vonë. Znj. Kryemadhi do të jetë në krah të liderave të tjerë politikë, duke e ndjekur ceremoninë krejt nga larg.
Paradoksi i dytë lidhet me ceremonialin në vetvete. Konform protokollit, ceremonia e nominimit drejtohet nga kreu i Kuvendit, që në rastin tonë është ende Ilir Meta. Gjithsesi, protokolli ja ka dalë në këtë moment, sepse zv/kryetarja e para Valentina Leskaj do jetë personi që do të zbatojë. Për hir të së vërtetës, znj. Leskaj e ka drejtuar më shumë se z.Meta parlamentin shqiptar në këtë legjislaturë, ose të paktën njësoj.
Kumtohet se presidenti i ardhshëm ka refuzuar edhe vilën presidenciale, për të qëndruar në banesën e tij përgjatë të gjithë 5 viteve që do të ushtrojë detyrën.
Ndërkohë një paradoks tjetër lidhet me faktin që kreu i parlamentit shqiptar dhe së shpejti president i vendit duhet të dorëzojë mandatin e deputetit. Dhe, në listën e qarkut të Tiranës, është emri i Ylli Manjanit, që i takon të marrë mandatin e tij. Por, duke ditur se ky i fundit e ka refuzuar, atëherë jemi përballë edhe një paradoksi tjetër, më të vogël, që i shtohet atyre të presidentit të ri shqiptar.
Presidenca e re shqiptare ndërkohë nuk po i përmbahet edhe një kortezie protokollare, që duhet thënë se nuk e kanë respektuar dhe presidentët e tjerë. Vizita e para zyrtare nuk do jetë në Kosovë, por në Itali, një vend me të cilin Shqipëria ndan vërtetë shumë interesa të fushave të ndryshme. Një presidencë e filluar mes paradokseve lajmëron një presidencë jo shumë komode për polikën shqiptare të këtyre pesë viteve. (b.an)
