Ndërprerja e provave bërthamore koreano-veriore është kushti i parë paraprak para se SHBA-ja të pranojë të diskutojë me regjimin e Phenianit, konfirmoi sot ambasadorja amerikane në OKB, Nikki Haley.
“Koreano-veriorët duhet të ndërpresin provat e tyre bërthamore. Ata duhet të pranojnë për të folur për ndalimin e armëve bërthamore, para çdo diskutimi”, theksoi ajo në një intervistë për ABC News duke nënvizuar se ndërprerja e provave bërthamore duhet të zgjasë për shumë kohë para se negociatat të mund të kalojnë në një fazë tjetër.
“Kjo nuk mund të ndodhë brenda ditës”, nënvizoi Haley.
“Donald Trump theksoi se ne mund të flasim në një moment me Korenë e Veriut, por shumë gjëra duhet të përparojnë”, theksoi ajo.
Presidenti amerikan, Donald Trump theksoi një ditë më parë se ishte i gatshëm të takohej me liderin koreano-verior, Kim Jong-Un, ndërkohë që shpresat për një ngrohje mes dy Koreve janë shfaqur që prej fundit të javës pas disa muajve përshkallëzim dhe retorike kërcënuese mes Phenianit dhe Uashingtonit./b.d
