Kryeministri Edi Rama ka prezantuar “Paqjen Fiskale” pjesë e projektbuxhetit 2026, e cila synon të krijojë një kapitull të ri besimi dhe bashkëpunimi mes administratës tatimore dhe biznesit privat.
Rama tha se kjo paketë synon mbylljen e çështjeve të vjetra fiskale për të dhënë krah besimit të ri dhe për të forcuar marrëdhënien mes shtetit dhe biznesit.
“Paketa fiskale e parashikuar qysh në buxhetin e vitit të ardhshëm do të hapë një kapitull të ri mes sipërmarrjes dhe administratës tatimore. Paqja fiskale e promovuar gjatë procesit elektoral, është tani më një paketë e shkruar e konceptuar për të forcuar bashkëpunimin dhe rritur besimin mes administratës tatimore dhe sipërmarrjes. Do të mbyllim çështjet e vjetra për t’i dhënë krah këtij besimi dhe për të forcuar këtë bashkëpunim”, tha Rama.
Rama theksoi se kjo është një paqe fiskale e shkruar, që do të diskutohet në Kuvend dhe jo thjesht një premtim elektoral, duke e konsideruar si një hap të rëndësishëm drejt besimit dhe bashkëpunimit mes shtetit dhe sektorit privat. Rama shpjegoi edhe se si do të funksionojë kjo paqe fiskale për fshirjen e detyrimeve të prapambetura.
“Procesi do të realizohet në dy forma, së pari do të ofrohet një falje për të gjithë sipërmarrjet me detyrimet prapambetura. A. Fshirje e plotë e detyrimeve tatimore të papaguara që i përkasin periudhave më të hershme de 10 vite të regjistruara në llogaritë tatimore të subjekteve. B. Fshirje 50% e detyrimeve për periudhat 5-10 vite nëse shuma e mbetur paguhet njëherësh brenda një afati të përcaktuar së bashku me fshirjen e gjobave dhe të interesave. C. Fshirje 25% të detyrimeve për të njëjtën periudhë 5-10 nëse shuma paguhen me këste brenda 1 viti së bashku me fshirje të gjobave dhe interesave. D. Fshirje e gjobave dhe kamatëvonesave për periudhat 1-5 vite me kusht që të paguhet i plotë, tatimi tarifa ose kontributi i të njëjtës periudhë.
Do t’i jepet mundësia të gjithë sipërmarrjeve të korrigjojnë pasaktësira në deklarimet e mëparshme në pasqyrat e tyre financiare. Për ndryshime mes deklarimit të vjetër dhe të atij të ri të vetëkorigjuar, do të paguhet vetëm 5% tatim mbi fitimin.
Për një periudhë që mund të shtrihet deri në 3 vite, sipërmarrjet mund të lidhin marrëveshje vullnetare me administratën tatimore ku të pranojnë të rrisin me 18% fitimin e tatueshëm krahasuar me vitin e kaluar, ndërsa për çdo shtesë mbi këtë fitim tatimi do të jetë vetëm 5%. Gjatë kohës që është në fuqi marrëveshja e paqes fiskale, sipërmarrjet nuk do t’i nënshtrohen kontrolleve tatimore që lidhen me tatimin mbi fitimin. Është një paqe e shkruar që do të diskutohet në Kuvend dhe jo një paqe thjesht e propozuar thjeshte në program elektoral”, tha Rama.
Fshirja e detyrimeve të prapambetura:
- 100% e detyrimeve tatimore të papaguara për periudhat më të hershme se 10 vite.
- 50% e detyrimeve për periudhat 5-10 vjeç, nëse shuma paguhet njëherësh, duke përfshirë edhe fshirjen e gjobave dhe interesave.
- 25% e detyrimeve për të njëjtën periudhë nëse shuma paguhet me këste brenda një viti, gjithashtu me fshirjen e gjobave dhe interesave.
- Fshirja e gjobave dhe kamatëvonesave për periudhat 1-5 vjeç, me kusht që tatimi i plotë të paguhet.
