Papa Françesku i drejtoi lutje Zotit për konvertimin e shpirtit ndaj të gjithë atyre që mbjellin vdekje dhe shkatërrim, dy ditë pas një seri sulmesh terroriste të kryera nga grupi i Shtetit Islamik (ISIS) në Siri.
Gjatë audiencës së përjavshme në sheshin ”Shën Pjetri”, papa drejtoi lutje në mënyrë që Zoti të ofrojë prehje të përjetshme për viktimat dhe ngushëllime për të afërmit e tyre, pas sulmeve kamikaze ku u regjistruan 150 të vdekur, në dy bastione të regjimit sirian.
Jorge Bergoglio dëshmoi se viktimat ishin kryesisht nga radhët e civilëve të pambrojtur, përpara se t’u propozonte besimtarëve të mbledhur në shesh për të drejtuar lutje për ta.
Sipas Observatorit Sirian për të Drejtat e Njeriut (OSDH), në mesin e të vrarëve ishin së paku tetë fëmijë, katër mjekë, infermierë si dhe studentë.
