Papa Françesku në fjalimin e parë të Krishtlindjeve në mesazhin “Urbi et orbi” kujtoi vendet e ndryshme të botës, që kanë nevojë për paqe e pajtim dhë bëri këtë urim:
“Urimi im i Krishtlindjes, është urim vëllazërimi. Vëllazërim ndërmjet njerëzve të çdo kombi e kulture! Vëllazërim ndërmjet njerëzve me ide të ndryshme, por të aftë ta respektojnë e ta dëgjojnë tjetrin”.
Ndërkohë, mesnatën e djeshme, Papa mbajti meshën e parë të Krishtilindjeve. Ati i Shenjtë drejtoi një thirrje njerzve të vendeve të zhvilluara që të kërkojnë një jetë më të thjeshtë, më pak materialiste, duke dënuar ndarjen e thellë midis të varfërve dhe të pasurve.
Gjatë meshës së mbajtur në bazilikën e Shën Pjetrit në Vatikan, Papa Françesku tha se lindja e Jezusit në varfëri duhet të bëjë që të gjithë të reflektojnë mbi kuptimin e jetës.
“Le të pyesim veten: A më duhen vërtet të gjitha këto objekte materiale dhe këto receta të komplikuara për jetën? A mund të menaxhojmë pa këto dhe të bëjmë një jetë me një thjeshtësi edhe më të madhe?”
Mijëra të krishterë anembanë botës u grumbulluan në qytetin e Betlehemit në Bregun Perëndimor për të festuar lindjen e Krishtit në vendin ku ata besojnë se ka ndodhur, 2 mijë vjet më parë.
Pelegrinë nga e gjithë bota kishin ardhur për vizituar Guvën e Lindjes së Krishtit.
Djem dhe vajza të vogla mbajtën një marshim shumëngjyrësh përmes sheshit deri tek një pemë gjigande Krishtlindjeje përballë kishës së Lindjes së Krishtit.
Parada u zhvillua pranë një pllakate të madhe ku lexohej “Lutuni për lirinë e Palestinës”, në praninë e banorëve vendas dhe turistëve.
Ndërsa në Pakistan mesha e Krishlindjes u mbajt nën masa të shtuara të policisë, në qytetin Karaçi.
Këtë vit nuk u shënuan incidente, ndryshe nga një vit më parë kur festës i paraprinë sulme të përgjakshme në disa kisha në vend.
a.çupaj
